10 દિવસમાં ખાડા નહી પુરાશે તો પાલિકાની તાળાબંધી કરવાની કાર્યકરોએ ચીમકી ઉચ્ચારી
(વર્તમાન પ્રવાહ વાપી બ્યુરો)
વાપી, તા.06: વાપી શહેર પૂર્વ-પશ્ચિમ વિસ્તારોના રોડો ઉપર પડી ગયેલા ખાડાઓ માટે વિરોધ પક્ષ આંદોલન ચલાવી રહેલ છે. થોડા સમય પહેલા ખાડાઓમાં છોડ વાવવાનો કાર્યક્રમ કર્યો હતો. આજે શુક્રવારે કોંગ્રેસ અને આપના કાર્યકરોએ રોડના ખાડાઓનું પૂજન કરીને પાલિકાને 10 દિવસમાં ખાડા પુરી રોડ સરખા બનાવાનું અલ્ટીમેટમ આપ્યું હતું.
વાપી શહેર કોંગ્રેસ પ્રમુખ નિમેશ દેસાઈ તથા પાલિકા વિરોધ પક્ષના નેતાખંડુભાઈ અને કાર્યકરોએ વાપીમાં તમામ રોડ તૂટી ફૂટી ગયા છે. તેને મરામત કરાવામાં આવે તેવી બુલંદ હાકલ સાથે ખાડા પૂજનનો કાર્યક્રમ યોજ્યો હતો. વાસ્તવિકતા પણ એવી જ છે. શહેરના તમામ 10 વોર્ડના આંતરીક અને જાહેર રોડ ચોમાસામાં તૂટી ચૂક્યા છે. લોકો હેરાન પરેશાન થઈ રહ્યા છે ત્યારે આ મામલો કોંગ્રેસ શરૂઆતથી આંદોલન ચલાવી રહેલ છે. આજે પાલિકા સામે દેખાવો યોજીને બાદમાં ખાડા પૂજન કાર્યક્રમ યોજ્યો હતો. તદ્દઉપરાંત વિરોધ પક્ષના નેતા ખંડુભાઈએ પાલિકાને અલ્ટીમેટમ આપ્યું હતું કે 10 દિવસમાં ખાડા નહી પુરાય, રોડની મરામત કામગીરી પુર્ણ નહી કરાય તો મોટુ આંદોલન કરીને પાલિકાની તાળાબંધી કરીશું.
