જાહેરમાં જીવના જોખમે સ્ટંટ કરવાનો વાપીમાં આ ત્રીજો બનાવ બન્યો હતો
(વર્તમાન પ્રવાહ વાપી બ્યુરો)
વાપી, તા.15: આજના યુવાનોને સોશિયલ મીડિયામાં સસ્તી પ્રસિધ્ધિ મેળવવાની ઘેલછા હદ વટાવી રહી છે. હાલમાં જ વાપી ગુંદન વિસ્તારમાં કારના બોયનેટ ઉપર એરગાન સાથે રાખીને સ્ટંટનો વિડીયો બનાવ્યો હતો. જે વિડીયો વાયરલ થતાની સાથે જ જીઆઈઢીસી પોલીસે બન્ને યુવાનોની ધરપકડ કરીને કાયદાનો પાઠ ભણાવ્યો હતો.
વાપીમાં વૈશાલી રોડ ઉપર રીક્ષામાં લટકીને એક યુવાને વિડીયો બનાવ્યો હતો. બીજો બનાવ કોપરલી રોડ ગાર્ડન પાસે બાઈક ઉપર સ્ટંટ કરતો કિશોરે વિડીયો બનાવ્યો હતો. બન્ને બનાવોમાંપોલીસે તાત્કાલિક પગલા લઈ કાયદેસરની કાર્યવાહી કરી હતી. શુક્રવારે ત્રીજો તેવો જ બનાવ ગુંજનમાં બન્યો હતો. સમીર સલમાની નામના યુવાને બોયનેટ ઉપર બેસી એરગન સાથે રાખી વિડીયો બનાવેલો તથા કાર સમીર શેખ નામનો યુવાન ચલાવતો હતો. વિડીયો વાયરલ થતા જ જીઆઈડીસી પોલીસે બન્ને સ્ટંટ કરનાર યુવાનોની ધરપકડ કરી જાહેરમાં માફી મંગાવીને કાયદેસરની કાર્યવાહી કરી હતી. તેમ છતાં વાપીમાં સ્ટંટ કરવાની ઘેલછા યુવાનો જીવના જોખમે કરે છે તે સમાજ અને પરિવાર માટે ચિંતાજનક છે.