(વર્તમાન પ્રવાહ ન્યુઝ નેટવર્ક)
પારડી, તા.18: પારડીના મોતીવાડા ખાતે ઘટેલી રેપ વિથ મર્ડરની ગંભીર ઘટનાને પાંચ-પાંચ દિવસ થઈ ગયા હોવા છતાં આરોપી પોલીસ પકડથી દૂર છે.
સંયમ રાખીને બેસેલા નાગરિકોમાં ધીમે ધીમે આક્રોશ વધી રહ્યો હોય વલસાડ પોલીસે પણ તપાસના ચક્રો ગતિમાન કરી દીધા છે. ચારેકોર આ ઘટનાની ચર્ચાની ગંભીરતાને ધ્યાનમાં રાખી, રેન્જ આઈ.જી. પ્રેમવીરસિંહ આજે પારડી ખાતે પહોંચ્યા હતા અને ઘટના સ્થળની અને પરિવારજનોની મુલાકાત લીધી હતી.
આઈ.જી.એ વલસાડ પોલીસની તપાસની દિશા અને પ્રગતિની સમીક્ષા કરી આરોપીને ઝડપવા માટે દરેક શકય પ્રયાસ કરી રહ્યાં હોવાનું નોંધ્યું હતું અને વલસાડ પોલીસને વધુ અસરકારક પગલાં લેવા અને તપાસને વધુ સુસંગત બનાવવા માટે જરૂરી માર્ગદર્શન આપ્યું હતું.
વલસાડ પોલીસે પણ અત્યાર સુધીના પગલાંઓ વિશે માહિતી આપી અને હવે પછીની દિશાઓ દર્શાવી હતી. આ સાથે જ નાગરિકોને ન્યાય મળે તે માટે કડક કાર્યવાહી કરવાની ખાતરી આપવામાં આવી હતી.
