(વર્તમાન પ્રવાહ ન્યુઝ નેટવર્ક)
દમણ, તા. 20
દમણ જિલ્લાની આજે તમામ ગ્રામ પંચાયતોએ પોતાના વિસ્તારમાં સિંગલ યુઝ પ્લાસ્ટિકના વપરાશ ઉપર પ્રતિબંધ મુકવા તથા પોતાની પંચાયતને ઓપન ડેફેકેશન ફ્રી(ઓડીએફ) મુક્ત કરવા સર્વાનુમતે ઠરાવ પસાર કરવામાં આવ્યો હતો.
દમણવાડા ગ્રામપંચાયતના સરપંચ શ્રી મુકેશ ગોસાવીના નેતૃત્વમાં ‘સ્વચ્છતા હી સેવા’ અંતર્ગત આજે ગ્રામ પંચાયત વિસ્તારમાં સિંગલ યુઝ પ્લાસ્ટિક ઉપર પ્રતિબંધ અને દરેક ગામોમાં ખુલ્લામાં કુદરતી હાજતે જવામાંથી છૂટકારા બાબતે પણ પ્રસ્તાવ પસાર કરવામાં આવ્યો હતો. દમણવાડા ગૃપ ગ્રામ પંચાયત દ્વારા પંચાયતને તમાકુ અને ગુટખા મુક્ત કરવા લીધેલા સંકલ્પને દોહરાવી ફરી તેને ચુસ્ત રીતે લોકો પાસે પાલન કરાવવાનો પણ નિર્ધાર વ્યક્ત કરાયો હતો.
આ બેઠકમાં સરપંચ શ્રી મુકેશ ગોસાવી, ઉપ સરપંચ શ્રી મિલન રાયચંદ, શ્રી વિષ્ણુ બાબુ, સેક્રેટરી શ્રી નિખિલ મીટના સહિત સભ્યો ઉપસ્થિત રહ્યા હતા.
