દમણ-દીવના પૂર્વ સાંસદ લાલુભાઈ પટેલે ખાસ ઉપસ્થિત રહી ભીખી માતા અને મહાદેવના લીધેલા આશીર્વાદ
(વર્તમાન પ્રવાહ ન્યુઝ નેટવર્ક)
દમણ, તા.20: મોટી દમણના પટલારા ખાતેના ભીખી માતા મંદિર અને હરિ હરેશ્વર મહાદેવ મંદિરના 8મા પાટોત્સવની ખુબ જ ધામધૂમ અને ભક્તિભાવથી ઉજવણી કરવામાં આવી હતી. આ પ્રસંગે દમણ-દીવના પૂર્વ સાંસદ શ્રી લાલુભાઈ પટેલ ખાસ ઉપસ્થિત રહ્યા હતા.
પ્રાપ્ત માહિતી પ્રમાણે પટલારા ગામ સ્થિત પ્રાચીન કાળથી આસ્થાના પ્રતિક એવા ભીખી માતા અને હરિહરેશ્વર મહાદેવ મંદિરના 8મા પાટોત્સવનું આયોજન કરવામાં આવ્યું હતું. આ પ્રસંગે દમણ-દીવના પૂર્વ સાંસદ શ્રી લાલુભાઈ પટેલને ખાસ આમંત્રણ આપવામાં આવ્યું હતું. જેને માન આપી તેઓ અચૂક હાજર રહ્યા હતા.
કાર્યક્રમનો પ્રારંભ સવારે મહાયજ્ઞ બાદ વાજતે ગાજતે ભજન-ધૂનની સૂરાવલી સાથે ભવ્ય પાલખી યાત્રા કાઢવામાં આવી હતી. જેમાં મોટી સંખ્યામાં ભાવિક ભક્તો જોડાયા હતા.
આ અવસરે સંઘપ્રદેશ ભાજપના ઉપાધ્યક્ષ શ્રી નવિનભાઈ પટેલ, દમણ નગરપાલિકાના પ્રમુખ અને દમણ જિલ્લા ભાજપ પ્રમુખ શ્રી અસ્પી દમણિયા પણ ઉપસ્થિત રહ્યા હતા અને ભીખી માતા, હરિ હરેશ્વર મહાદેવ મંદિરે દર્શન કરી આશીર્વાદ લીધા હતા.
આ પ્રસંગે મહાપ્રસાદનું પણ આયોજન કરવામાં આવ્યું હતું. જેમાં મોટી સંખ્યામાં ભક્તોએ પ્રસાદ ગ્રહણ કર્યો હતો.
