(વર્તમાન પ્રવાહ ન્યુઝ નેટવર્ક)
પારડી, તા.13: પારડી તાલુકાના કીકરલા ગામે નાની કોળીવાડ ખાતે રહેતા અશોક પરાગભાઈ કો. પટેલે વર્ષ 2018માં વાપીથી લોન કરી એક છોટાહાથી ટેમ્પો ભાડે ફેરવવા વેચાણથી લીધો હતો. તેઓએ ગત તા.11-10-2023 ના રોજ પોતાનો છોટા હાથી ટેમ્પો નં.જીજે-15- એટી-5061 લઈ ઉમરસાડી એક દેસાઈની વાડીમાં મજૂરો લઈ ચીકુ તોડવા ગયા હતા. જે ચીકુનો જથ્થો સરોધી ખાતે ખાલી કર્યા બાદ સાંજે ઘરે આવ્યા બાદ છોટા હાથી ટેમ્પોને તેમણે પોતાના ઘર આંગણામાં લોક કરી પાર્ક કર્યો હતો. આ દરમિયાન રાત્રીના કોઈ ચોર ઈસમ આ ટેમ્પાનું લોક તોડી અથવા ડુપ્લીકેટ ચાવી વડે ખોલી ટેમ્પાની ચોરી કરી ફરાર થઈ ગયો હતો. સવારે ઉઠી અશોકભાઈએ જોતા આંગણામાં પાર્ક કરેલો ટેમ્પો ગાયબ હતો. જેથી આજુબાજુ શોધખોળ બાદ પારડી પોલીસ મથકે અજાણ્યા ચોર વિરુદ્ધ ટેમ્પો ચોરીની ફરિયાદ નોંધાવી હતી જે આધારે પારડી પોલીસે કીકરલા ગામમાં અવર જવર કરતા માર્ગ પર લાગેલા સીસીટીવી શોધી ચોરનું પગેરું મેળવવાની કવાયત હાથ ધરી છે.