-
મહેશ ગાવિત આઈ.આર.બી.માં પી.એસ.આઈ.ની નોકરી કરી ચુક્યા હોવાથી વહીવટી ક્ષેત્રે કાબેલ, રાજનીતિમાં પારંગત અને સમસ્યાના ઉકેલ લાવવા પણ મહારથ ધરાવતા હોવાનો મત
(વર્તમાન પ્રવાહ ન્યુઝ નેટવર્ક)
સેલવાસ, તા.07
દાદરા નગર હવેલી લોકસભા બેઠકની પેટા ચૂંટણીમાં ભાજપના સત્તાવાર ઉમેદવાર તરીકે શ્રી મહેશ ગાવિતની વરણી થતાં જિલ્લામાં આનંદ અને ઉલ્લાસનું વાતાવરણ જોવા મળ્યું હતું અને સેલવાસના અટલ ભવન ખાતે કાર્યકરોની મળેલી બેઠકમાં પણ એક અને નેક બની ભાજપના ઉમેદવાર શ્રી મહેશભાઈ ગાવિતને પ્રચંડ બહુમતિથી વિજેતાબનાવવાનો રણટંકાર થયો હતો.
પૂર્વ સાંસદ શ્રી નટુભાઈ પટેલ, સેલવાસ ન.પા.ના અધ્યક્ષ શ્રી રાકેશસિંહ ચૌહાણ સહિતના તમામ નેતાઓએ શ્રી મહેશભાઈ ગાવિતને વિજેતા બનાવવાનો સંકલ્પ લીધો હતો.
શ્રી મહેશભાઈ ગાવિત દાદરા નગર હવેલીના છેવાડેના વિસ્તાર કૌંચાથી પ્રતિનિધિત્વ કરી રહ્યા છે. શિક્ષિત તથા રાજકીય અનુભવ પણ ધરાવતા હોવાથી પ્રશાસનિક વહીવટી કામોમાં પણ પોતાની આગવી આવડત ધરાવે છે. જેના કારણે જિલ્લાની નાની મોટી સમસ્યાઓ તેઓ સ્થાનિક સ્તરે જ રજૂઆત કરી ઉકેલ લાવવા સક્ષમ હોવાનું દેખાઈ રહ્યું છે. જેનો લાભ તેમને ચૂંટણીમાં મળશે એવું આકલન પણ વ્યક્ત થઈ રહ્યું છે.
આજે ભાજપ પ્રભારી શ્રીમતી વિજ્યા રહાટકર, પ્રદેશ ભાજપ પ્રમુખ શ્રી દીપેશભાઈ ટંડેલ, પ્રદેશના સંગઠન મંત્રી શ્રી વિવેક દાઢકર સહિતના નેતાઓએ શુભકામના પાઠવી આ બેઠક પ્રચંડ બહુમતિથી જીતી પ્રધાનમંત્રી શ્રી નરેન્દ્રભાઈ મોદીને ભેટમાં આપવા નિર્ધાર કર્યો હતો.
