-
સંબંધિત તંત્ર યોગ્ય કાર્યવાહી કરી ગેરકાયદે અને અસમાજિક પ્રવૃત્તિ ઉપર તાત્કાલિક રોક લગાવે એવી પ્રબળ બનેલી માંગ
(વર્તમાન પ્રવાહ ન્યુઝ નેટવર્ક)
દમણ, તા.22
સંઘપ્રદેશના પ્રશાસક શ્રી પ્રફુલભાઈ પટેલ દિવાળી રજા દરમિયાન પ્રદેશની બહાર રહેતા દમણમાં જુગાર, મટકા તથા ઓઈલ-કેમિકલ ચોરી જેવા ગોરખધંધા મોટા પાયે શરૂ થયા હોવાની ચર્ચા સોશિયલ મીડિયામાં વ્યાપક પણે થઈ રહી છે.
પ્રાપ્ત માહિતી પ્રમાણે એક સમયે અસમાજિક પ્રવૃત્તિ અનેગેરકાયદે કામોમાં બદનામ બનેલા દમણને સીધી લાઈનમાં લાવવા પ્રશાસક શ્રી પ્રફુલભાઈ પટેલે પોતાની તમામ શક્તિ કામે લગાવી હતી. જેના પરિણામ સ્વરૂપ દમણ ખાતે ગેરકાયદે પ્રવૃત્તિમાં ઓટ આવી હતી. પરંતુ તેઓ પ્રદેશની બહાર રહેતા દમણ ખાતે જુગાર, મટકા, દેહ વેપાર, ઓઈલ-કેમિકલ ચોરી જેવા આંતરરાજ્ય રેકેટનું મુખ્ય કેન્દ્ર દમણ બની ગયું હોવાની ચર્ચા દિન-પ્રતિદિન સોશિયલ મીડિયામાં થઈ રહી છે. આ બાબતે સંબંધિત તંત્ર યોગ્ય કાર્યવાહી કરી ગેરકાયદે અને અસમાજિક પ્રવૃત્તિ ઉપર તાત્કાલિક રોક લગાવે એવી માંગ પ્રબળ બની છે.
