-
પાલિકાની 43 બેઠકો માટે 129 બુથો ઉપર મતદાન યોજાશે
(વર્તમાન પ્રવાહ વાપી બ્યુરો)
વાપી, તા.25
વાપી નગરપાલિકાની સામાન્ય ચૂંટણી આડે માત્ર ગણતરીના કલાકો જ બાકી રહ્યા છે ત્યારે ચૂંટણીનો કસુબલ રંગ ધીરે ધીરે શહેરમાં જોર પકડતો જાય છે. વાપી પાલિકાની 2021ની ચૂંટણીમાં નવા 15602 યુવા મતદારો નોંધાયા છે. જેઓ પ્રથમવાર જ મતદાન કરવાના છે ત્યારે આ યુવા મતદારો નિર્ણાયક બનશે એ ચોક્કસ છે.
વાપી નગરપાલિકામાં કુલ 11 વોર્ડ મળીને 102205 મતદારો છે તેમાં સૌથી વધુ મતદારો વોર્ડ નં.05માં 11933 છે જ્યારે સૌથી ઓછા મતદાર વોર્ડ નં.1માં 6337 મતદારો છે. આગામી તા.28 નવેમ્બરના રોજ ચૂંટણી મતદાન યોજાનાર છે. તેથી વહીવટી તંત્ર દ્વારા કુલ 43 બેઠકો માટે 129 બુથો ઉપર મતદાન યોજાશે તેની તૈયારી આરંભાઈ દીધી છે.
હાલમાં પાલિકામાં ત્રિપાંખીયો જંગ ભાજપ, કોંગ્રેસ અને આપ વચ્ચે ચાલી રહ્યો છે. પણ હકીકતમાં તો ભાજપ અને કોંગ્રેસ વચ્ચે સીધો જંગ છે. આમ આદમી પાર્ટીના ભલે 25 ઉમેદવારો ચૂંટણી લડી રહ્યા હોય પણ તેઓ માત્ર ભાજપ-કોંગ્રેસના મતોનું ધૃવીકરણ કરશે. એક પણ ઉમેદવાર જીતની રેશમાં હોય તેવુહાલમાં દેખાઈ રહ્યું નથી. બીજી તરફ નગરપંચાયતની સ્થાપના 1995માં થઈ ત્યાંથી આજ સુધી કોંગ્રેસ કદાપિ જીતી નથી એટલે ભાજપનો દબદબો રહેશે. જ્યારે વોર્ડ નં.6 કોંગ્રેસનો ગઢ રહ્યો છે ત્યાં સીધી કાંટાની ટક્કર છે. અલબત્ત પાલિકાનો કબજો તો ભાજપ જ કરશે કારણ કે ભાજપ પાસે કાર્યકરો છે અને વ્યુહરચના પણ છે.