ડાંગર અને શાકભાજી પાકને વ્યાપક નુકસાન થતા જગતનો તાત ચિંતાતુર બન્યો
(વર્તમાન પ્રવાહ વાપી બ્યુરો) વલસાડ, તા.01
છેલ્લા બે દિવસથી વાતાવરણમાં થયેલા પલટાને લઈ વાપી સહિત વલસાડ જિલ્લામાં આજે બુધવારે ઠેર ઠેર કમોસમી વરસાદ પડયો હતો. ભર શિયાળે ચોમાસાનો માહોલપથરાઈ ગયેલો જોવા મળ્યો હતો.
ક્લાઈમેન્ટ ચેઈન્જની આડ અસરોને લઈ કુદરતી ઋતુચક્ર પણ બદલાઈ જતુ જોવા મળી રહ્યું છે. જેનો પરચો માનવ જાતને સર્વત્ર ધરતી ઉપર જોવા મળી રહ્યો છે તે અનુસંધાનમાં ડિસેમ્બર મહિનો એટલે ઠંડીના મહિનામાં વલસાડ જિલ્લામાં આજે કમોસમી વરસાદ વરસતો જોવા મળ્યો હતો. કમોસમી વરસાદથી સીધી આડ અસર જગતના તાત ઉપર પડી છે.
ડાંગરનો માલ તૈયાર બગડી ચૂક્યો છે તો બીજી તરફ શાકભાજીના પાકોમાં પણ કમોસમી વરસાદથી વ્યાપક નુકશાન થયું છે. છેલ્લા બે દિવસથી સૂર્યનારાયણના દર્શન બંધ છે. વાતાવરણમાં ઠંડક પ્રસરવાની સાથે આખો દિવસ ઝરમર-ઝરમર વરસાદ જિલ્લામાં પડતો રહ્યો. અગમચેતીના ભાગ રૂપે વહીવટી તંત્રએ પણ એન.ડી.આર.એફ.ની ટીમ સ્ટેન્ડબાય કરી છે.
