મદરેસાના વિદ્યાર્થીઓને ઈનામ અને ધાબળા આપી દેશદાઝ માટે પણ કરેલા પ્રેરિત
(વર્તમાન પ્રવાહ ન્યુઝ નેટવર્ક)
દમણ, તા. 20
દમણ જિલ્લાની સૌથી મોટી મુસ્લિમ સંસ્થા ‘દમણ મુસ્લિમ એસોસિએશન’ દ્વારા આજે દમણ-દીવના 61માં મુક્તિ દિવસની ઉત્સાહભેર ઉજવણી કરવામાં આવી હતી. સવારે 10:30 કલાકે માંજરાઝ પાર્કિંગ, ખારીવાડ ખાતે મુક્તિ દિવસના કાર્યક્રમનું આયોજન કરવામાં આવ્યું હતું.
મુસ્લિમ સમાજના વડીલ અલ્હાજ અબ્દુલ અઝીઝ (વાહીદ ટ્રાન્સપોર્ટ, દમણવાલા) એ દમણ મુસ્લિમ એસોસિએશનના પ્રમુખ હાજી શ્રી ખુર્શીદ માંજારાની સાથે સન્માનપૂર્વક ભારતના ગૌરવનું પ્રતિક ત્રિરંગો લહેરાવી રાષ્ટ્રધ્વજને સલામી આપી હતી. જેમાં મુસ્લિમ સમાજના લોકોએ અને મદરેસાના વિદ્યાર્થીઓ પણ જોડાયા હતા.
સદર હાજી શ્રી ખુર્શીદ માંજરાએ આઝાદી અપાવનાર બહાદુર સપૂતોને યાદ કરીને દમણ-દીવના લોકોને 61મા મુક્તિ દિવસની શુભેચ્છા પાઠવી હતી અને નવી પેઢીને માદરેવતન અને વતનપરસ્તી અંગે શિખામણ આપી હતી.
દમણ અને દીવના મુક્તિ દિવસની ઉજવણી દરમિયાન મદરેસાના વિદ્યાર્થીઓને ઈનામો અને ધાબળા આપવામાં આવ્યા હતા. દમણ મુસ્લિમ એસોસિએશન દ્વારા મુસ્લિમ સમાજના લોકોમાં એકતા, પરસ્પર સંવાદ અને રાષ્ટ્રીય ભાવનાના સંચારમાટે 15 ઓગસ્ટ, 26 જાન્યુઆરી, 19 ડિસેમ્બર જેવા રાષ્ટ્રીય તહેવારોની ઉજવણી કરવામાં આવે છે.