(વર્તમાન પ્રવાહ વાપી બ્યુરો)
વાપી, તા.22
નેશનલ હાઈવે 848 ઉપર છાશવારે અકસ્માતો સર્જાતા રહે છે તેમાં કુંભઘાટ ઉપર તો અઠવાડીયામાં એક બે અકસ્માતના બનાવો બનતા રહે છે તેવા વધુ બે બનાવ ગતરોજ બન્યા હતા. કુંભઘાટ ઉપર વાપી જવા નિકળેલ ટ્રક ખીણમાં ખાબકી હતી. જ્યારે એક બીજો અકસ્માત માંડવા પાસે ટ્રક અને ટેમ્પો વચ્ચે સર્જાયો હતો. જેમાં બન્ને વાહનના ચાલકો ગંભીર રીતે ઘાયલ થતા 108 દ્વારા નજીકની હોસ્પિટલમાં પોલીસે ખસેડયા હતા.
પ્રાપ્ત વિગતો અનુસાર માંડવા ગામે તડકેશ્વર મહાદેવ મંદિરના વળાંકમાં ટ્રક નં. કે.એ.08 એ.જી. 5018 અને અશોક લેલેન્ડ ટેમ્પો નં.જીજે 15 એટી 2407 વચ્ચે અકસ્માત સર્જાયો હતો. અકસ્માતમાં બન્ને વાહનોના ચાલકો ઘાયલ થયા હતા તેમજ બન્ને વાહનો પલટી મારીગયા હતા. નેશનલ હાઈવે 848 ઉપર અકસ્માતો એકધારા સર્જાતા રહે છે. તેમાં કુંભઘાટના વળાંક અતિ જોખમી હોવાથી ચાલકો અવાર-નવાર સ્ટેયરીંગ ઉપરથી કાબૂ ગુમાવતા રહે છે અને અકસ્માતો સર્જાતા રહે છે.
