(વર્તમાન પ્રવાહ ન્યુઝ નેટવર્ક)
સેલવાસ, તા.30
ખાનવેલ ખાતે વન વિભાગે વાયરલ વીડિયોના માધ્યમથી ખેરના લાકડાના તસ્કરને મુદ્દામાલ સાહિત ઝડપી પાડયો છે ખેરના કુલ 7735 કિલો માલ જેની અંદાજીત કિંમત 4.25 લાખ હોવાનું જાણવા મળ્યુ છે આરોપી પર અગાઉ પણ વન વિભાગ તેમજ પોલીસ કેસ હોવાનુ જાણવા મળ્યુ છે.
પ્રાપ્ત વિગત મુજબગત 28ડિસેમ્બરના દિને એક વાયરલ વિડીયો વન વિભાગ દાનહના અધિકારી સમક્ષ આવ્યો હતો. જેને લઈ અધિકારીઓએ તપાસ હાથ ધરી હતી. વીડિયોમાં નજરે ચડનાર કેટલાક લોકો ખેરના ઝાડ કાપી એના લાકડાની સફાઈ કરતા દેખાઈ રહ્યા હતા.
વીડિયોમા નજરે ચડતા લોકોની ઓળખ કર્યા બાદ આરોપી નિસાર કાસીમ કાળીયા (ઉ.વ.55)ને ત્યા છાપો માર્યો હતો. ઘટના સ્થળે જઈ જોતા ગોપજી મહાદુ વળવી નામક બીજા એક આરોપીના ઘર નજીકના માલિકીના 19 જેટલા ખેરના ઝાડ વગર પરમિશને કાપી નાખ્યા હતા અને એની સફાઈ કરી રહ્યા હતા. એ વિડીયો વાયરલ થયો હતો. જેમા આરોપી નિસાર કાળીયા ખેરના લાકડાની સફાઈ કરાવતા નજરે ચડી રહ્યો છે.
ફોરેસ્ટ એકટ મુજબ ગુન્હો નોંધી ખાનવેલ પોલીસની મદદથી આરોપીની ધરપકડ કરી આજે કોર્ટમાં રજૂ કર્યો હતો.ખેરના 7735 કિલો લાકડાની અંદાજીત કિંમત 4.25 લાખની થાય છે વધુ તપાસ આરએફઓ ધવલ ગાવિતે હાથ ધરી છે.