‘સબકી યોજના, સબકા વિકાસ’ અંતર્ગત રોડ, લાઈટ, પાણી, ગટરવ્યવસ્થા, આરોગ્ય તથા શિક્ષણ અને રોજગારીના મુદ્દાઓ ઉપર કરવામાં આવેલી ચર્ચા-વિચારણા
(વર્તમાન પ્રવાહ ન્યુઝ નેટવર્ક)
સેલવાસ,તા.07
દાદરા નગર હવેલીના મસાટ ગ્રામ પંચાયત ખાતે પાદરી ફળીયા ચર્ચ નજીક સરપંચશ્રી રણજીભાઈ પટેલની અધ્યક્ષતામાં ગ્રામસભાનું આયોજન કરવામાં આવ્યું હતું.
પ્રાપ્ત માહિતી મુબજ વિકાસ યોજના વર્ષ 2022-23ની કાર્ય યોજના બનાવવા માટે ‘સબકી યોજના, સબકા વિકાસ’ના સૂત્રને ચરિતાર્થ કરવા વિવિધ વિકાસના કામો જેવા કે પાણીની સમસ્યા, રોડની સમસ્યા, લાઈટ, ગટર, સ્વચ્છતા વગેરેની સમસ્યા તથા શિક્ષણ, આરોગ્ય અનેરમત-ગમત તથા રોજગાર જેવા મુખ્ય મુદ્દાના કામોને કેન્દ્રમાં રાખી આજે યોજાયેલી ગ્રામસભામાં બહાલી આપવામાં આવી હતી. તેની સાથે કોવિડ-19ને લઈને લોકોમાં જાગરૂકતા ફેલાવવા અને રસીકરણનો બીજો ડોઝ અને 15 થી 18વર્ષના બાળકો માટે વેક્સિન લેવા માટે ગ્રામજનોને સમજણ આપવામાં આવી હતી. સાથે સામાજીક દૂરી(સોશિયલ ડિસ્ટન્સિંગ), માસ્ક પહેરવું અને સેનેટાઇઝરનો ઉપયોગ કરવો તથા વારંવાર સાબુ કે શેમ્પુથી હાથ ધોવા માટે પણ લોકોને શિખામણ આપવામાં આવી હતી. ઉપરાંત ગામના અન્ય મુદ્દાઓ પર પણ ચર્ચાઓ કરવામાં આવી હતી.
આ અવસરે ગામના સરપંચ શ્રી રણજીતભાઈ પટેલ, જિલ્લા પંચાયત સભ્ય શ્રીમતી રેખાબેન પટેલ, ગ્રામ પંચાયતના સભ્યો, ડી.પી.ઓ., સી.ડી.પી.ઓ., સમાજ કલ્યાણ અધિકારી-કર્મચારીઓ, ડી.આર.ડી.એ., આરોગ્ય વિભાગના અધિકારી, વન વિભાગ વિભાગના અધિકારીઓ સહિત મોટી સંખ્યામાં ગ્રામજનો ઉપસ્થિત રહ્યા હતા.
