દમણ જિલ્લા પંચાયતમાં પ્રથમ અઢી વર્ષ પ્રમુખ પદ પુરુષ(મેલ) માટે અનામત હોવાથી ભાજપના પ્રતિક ઉપર ચૂંટાયેલા નવિનભાઈ પટેલ હોટ ફેવરિટ
(વર્તમાન પ્રવાહ ન્યુઝ નેટવર્ક) દમણ, તા.03
દમણ જિલ્લા પંચાયતના પ્રથમ અઢી વર્ષ માટે પ્રમુખ તરીકે પુરુષ(મેલ) અને પછીના અઢી વર્ષ માટે મહિલા(ફિમેલ) માટે પ્રમુખ પદ અનામત રાખવામાં આવેલ છે. તેથી બાકી રહેલા લગભગ 14 મહિના માટે દમણ જિલ્લા પંચાયતમાં ચૂંટાયેલા પુરુષ સભ્ય પૈકી કોઈ એકનું ભાગ્ય જોર કરશે એવું આકલન અત્યારે થઈ રહ્યું છે.
બીજી બાજુ પ્રશાસનિક વર્તુળો એવું અર્થઘટન કરી રહ્યા છે કે, પ્રથમ અઢી વર્ષ માટે પુરુષ વર્ગ માટે પ્રમુખ પદ અનામત રાખવાની કરેલી વ્યવસ્થામાં પુરુષની સાથે સાથે મહિલા અને ટ્રાન્સજેન્ડર પણ આવી જાય છે. જ્યારે ત્યાર પછીના અઢી વર્ષ સંપૂર્ણ રીતે મહિલા માટે આરક્ષિત રખાયેલા છે.
અત્રે નોંધનીય છે કે, કાનૂની નિષ્ણાંતો પ્રશાસનના અધિકારીઓના તર્ક સાથે સંમત થતા નથી. તેમના જણાવ્યા પ્રમાણે સરકારે પ્રથમ અઢી વર્ષ પુરુષ(મેલ) માટે અનામત મુકરર કરેલ છે એનો અર્થ એવો થાય છે કે માત્ર અને માત્ર પુરુષ ઉમેદવાર જ જિલ્લા પંચાયતના પ્રમુખ તરીકે પોતાનું ઉમેદવારી પત્રક ભરીશકે છે. જો આ નિયમોમાં પરિવર્તન કરવું હોય તો સંઘપ્રદેશના પ્રશાસકના નામે સૂચિત નીતિ-નિયમોમાં પુરુષ(મેલ)ના સ્થાને જનરલ વાંચવું એ પ્રકારનો કોરીજેન્ડમ બહાર પાડવામાં આવે તો પુરુષની સાથે સાથે મહિલા અને ટ્રાન્સજેન્ડર પણ દમણ જિલ્લા પંચાયતના પ્રમુખ પદ માટે દાવેદારી કરવા સક્ષમ બની શકે છે.
દમણ જિલ્લા પંચાયતમાં પ્રથમ અઢી વર્ષ પુરુષ ઉમેદવારો માટે પ્રમુખ પદ આરક્ષિત હોવાથી ભાજપના પ્રતિક ઉપર ચૂંટાયેલા પુરુષ ઉમેદવાર મરવડના એક માત્ર શ્રી નવિનભાઈ આર.પટેલ ઉપર સત્તારાણી હાલના તબક્કે મહેરબાન હોવાનું દેખાય રહ્યું છે.
