વલસાડઃ તા. 24: વલસાડના સફલ ચેરીટેબલ ટ્રસ્ટ દ્વારા જિલ્લા રોજગાર કચેરી તેમજ મોડેલ કેરીયર સેન્ટરના સહયોગથી અનુબંધમ પોર્ટલ અંતર્ગત માહિતી અને માર્ગદર્શન સેમિનારનું આયોજન કરવામાં આવ્યું હતું. આ સેમિનારમાં રોજગાર કચેરીના દિપેશભાઈ ભોયાએ રોજગાર કચેરી દ્વારા પુરી પાડવામાં આવતી વિવિધ સેવાઓ અંગે વિસ્તૃત જાણકારી આપી હતી. રોજગાર વિભાગ દ્વારા વર્તમાન સમયમાં ચાલુ કરેલા અનુબંધમ પોર્ટલ ઉમેદવારો કેવી રીતે પોતાનું રજિસ્ટ્રેશન કરાવી શકે તેની સંપૂર્ણ માહિતી પૂરી પાડી હતી અને આ નોંધણી માટે કયા-કયા ડોકયુમેન્ટની જરૂર રહેશે તે અંગે પણ સમજણ આપી હતી. રોજગાર કચેરીના કેતનભાઈ ચાંપાનેરીએ ઉમેદવારોને કારકિર્દી ઘડતરમાં અનુબંધમ પોર્ટલ કેવી રીતે ઉપયોગી નીવડી શકે તેની સચોટ જાણકારી આપી હતી. સફલ ચેરીટેબલ ટ્રસ્ટ યુવાનોને કૌશલ્યવાન બનાવી રોજગારી મેળવવા અને પગભર થવા માટે મદદરૂપ થાય છે તે બદલ ઉપસ્થિત અધિકારીઓએ તેમની કામગીરીની બિરદાવી હતી.
આ સેમિનારને સફળ બનાવવા સફલ ચેરીટેબલ ટ્રસ્ટના પારૂલ ગજ્જર, ફરહા શેખ, અને કેફિસાબેન મુલાતાનીનો સહયોગ પ્રાપ્ત થયો હતો.
