સામાન્યસભામાં 2022-23નું મનરેગાનું લેબર બજેટ પસાર કરાયું
(વર્તમાન પ્રવાહ વાપી બ્યુરો)
વાપી, તા.05: પારડી તાલુકા પંચાયતની સામાન્યસભા આજે મંગળવારે 11 કલાકે તા.પં. સભાખંડમાં યોજાઈ હતી. જેમાં એજન્ડા ઉપરના તમામ કામકાજોને સભ્યોએ સર્વાનુમત્તે બહાલી આપી હતી.
પારડી તાલુકા પંચાયતના પ્રમુખ મિતલબેન પુનિતભાઈ પટેલના અધ્યક્ષસ્થાને સભા યોજાઈ હતી. તાલુકા વિકાસ અધિકારી એસ.ડી. પટેલ, ઉપપ્રમુખ તરૂણભાઈ પટેલ, કારોબારી અધ્યક્ષ જગદીશભાઈ પટેલ, વિરોધપક્ષના નેતા બળવંતભાઈ પટેલ અને સભ્યોની હાજરીમાં આજે બપોરે તા.પં. સભાખંડમાં સામાન્યસભા યોજાઈ હતી. સભામાં 1પમા નાણાં પંચના રૂા.2.66 કરોડના વિવિધ વિકાસ કામોને બહાલીસભાએ આપી હતી. તેમજ વર્ષ 2022-23નું મનરેગા લેબર બજેટ પસાર કરવામાં આવ્યું હતું. આ પ્રસંગે તાલુકા વિકાસ અધિકારીએ રાજ્ય સરકાર દ્વારા આયોજીત વિકાસ રથની રૂપરેખા રજૂ કરી હતી તેમજ તમામને આ કાર્યક્રમમાં જોડાવવા અપીલ કરી હતી. ઉલ્લેખનીય છે કે સામાન્યસભામાં સરપંચો, ભાજપના કાર્યકરો સંગઠનના હોદ્દેદારો ઉપસ્થિત રહ્યા હતા તેમજ તા.પં.ના તમામ 21 સભ્યો પણ સામાન્યસભામાં હાજર રહ્યા હતા. શાંતિપૂર્ણ માહોલમાં સામાન્યસભા સંપન્ન થઈ હતી.