શાકભાજી માર્કેટમાં ભરાતા પાણીના નિકાલની કાયમી વ્યવસ્થા કરવી જરૂરી
(વર્તમાન પ્રવાહ ન્યુઝ નેટવર્ક) દમણ, તા.07
દમણમાં અનરાધાર વરસેલા વરસાદનાપગલે મોટી દમણ શાકભાજી માર્કેટમાં પાણી પાણી થઈ ગયું હતું. જેના કારણે નીચે બેસીને વેચનારા શાકભાજી વિક્રેતાઓને રોડ ઉપર વેચવાની ફરજ પડી હતી.
મોટી દમણમાં ભવ્ય શાકભાજી માર્કેટનું નિર્માણ થઈ રહ્યું છે. હવે ટૂંક સમયમાં જ શાકભાજી માર્કેટ નવા કોમ્પલેક્ષમાં શરૂ થવાના એંધાણ છે. પરંતુ આ ચોમાસું હાલમાં હંગામી ધોરણે બાજુમાં બનાવવામાં આવેલ જગ્યામાં જ કાઢવું પડે તેવી સ્થિતિ છે.
ભારે વરસાદના પગલે મોટી દમણ શાકભાજી માર્કેટમાં ઘૂંટણ સુધીના પાણીના ભરાવાના કારણે ગ્રાહકો પણ અંદર જવાનું ટાળી રહ્યા છે. જેના કારણે કેટલીક દુકાનોને બંધ રાખવા પણ ફરજ પડી હતી. શાકભાજી માર્કેટમાં ભરાતા પાણીનો કોઈ નિકાલ થાય એવી લોકોની લાગણી વ્યક્ત થઈ રહી છે.
