ઘરની છત સહિત જીવન જરૂરી તમામ ચીજવસ્તુઓ બળીને ખાખ થઈ જતા ભર ચોમાસે પરિવાર રોડ પર
(વર્તમાન પ્રવાહ ન્યુઝ નેટવર્ક)
પારડી, તા.23: પારડી તાલુકાના સોનવાડા ગામે ભગત ફળીયામાં રહેતા ચંપકભાઈ ભગુભાઈ પટેલ ગત રોજ કંપનીમાં નોકરી પર ગયા હતા અને તેમનો પુત્ર અને પત્ની પણ હોસ્પિટલમાં ગયા હતા. આ દરમિયાન આશરે સાંજે છ વાગ્યે તેમનાં કાચા મકાનમાં કોઈક કારણસર આગ લાગી હતી. આગનો ધુમાડો બાજુમાં રહેતી મહિલાએ જોતાં તેણે ફળિયામાં જાણ કરતા અફરાતફરી મચી ગઈ હતી. ગ્રામજનોએ દોડી જઈ પાણીનો મારો શરુ કર્યો હતો પરંતુ આગ એટલી હદે વિકરાળ હતી કે ઘરના પલંગ, ખુરશી, ત્રિપાઈ, ટીવી, ગાદલા, અનાજ કઠોળ, અને પશુઓ માટે રાખેલું ઘાસ સહિતનો તમામ જીવનજરૂરી સરસામાન બળીને ખાખ થઈ જવા પામ્યો હતો. વધુમાં ઘરની છતના નળિયાં પણ તૂટી પડયા હોય આગને લઈ ચોમાસાની સીઝનમાં પરિવાર રોડ પરઆવી ગયો છે. બનાવની જાણ ગામના સરપંચ સુનિતાબેન ચંદ્રકાંતભાઈ તલાટી માર્ગીબેન અને પારડી જીઈબીના દિપકભાઈ નાયકને થતા તમામ ઘટના સ્થળે દોડી જઈ જરૂરી કાર્યવાહી કરી હતી.
પરંતુ હાલમાં આ પરિવારની સ્થિતિ ખુબજ દયનિય હોય ઘરની સાથે જીવનજરૂરી સરસામાન પણ બળી જતા ખાવાના સાથે રહેવાના પણ ફાંફા પડી જતા કફોડી સ્થિતિમાં મુકાયેલા પરિવારે જવાબદાર તંત્ર પાસે મદદની માંગ કરી છે. પરિસ્થિતિ સમજી તંત્ર પણ મદદે આવે તે ખૂબ જ જરૂરી બન્યું છે.
