ત્રણ કેટેગરીમાં યોજાયેલ મેરેથોન દોડમાં 380 જેટલી મહિલાઓએ ભાગ લીધો
(વર્તમાન પ્રવાહ વાપી બ્યુરો)
વાપી, તા.20
વાપીની સામાજીક સંસ્થા જે.સી.આઈ. દ્વારા આજે સોમવારે ત્રીજી ફિમેલ નાઈટ મેરેથોન દોડનું આયોજનકરવામાં આવ્યું હતું. જેમાં વિવિધ ત્રણ કેટેગરીમાં 380 જેટલી મહિલાઓએ ભાગ લઈ મેરેથોન દોડ સફળ બનાવી હતી.
ફિટનેસ અને શારીરિક સ્વાસ્થ્ય માટે ખાસ મહિલાઓ માટે જે.સી.આઈ. દ્વારા નાઈટ મેરેથોન દોડનું આયોજન કરવામાં આવ્યું હતું. જેમાં 15 થી 22 વર્ષ, 23 થી 35 વર્ષ અને 36 થી 75 વર્ષની ત્રણ કેટેગરીમાં 380 જેટલી મહિલાઓ સ્પર્ધામાં જોડાઈ હતી. કોરોના કાળ પછી પ્રથમ વખત મેરેથોન દોડનું આયોજન કરવામાં આવ્યું હતું.
આ દોડ ચલા લેક ગાર્ડનથી કેવડી ફળીયા અને પરત ચલા લેક ગાર્ડનમાં સમાપન થઈ હતી. વિજેતા મહિલા સ્પર્ધકોને મેડલ, ટ્રોફી અને ગીફટ વાઉચર એનાયત કરવામાં આવ્યા હતા. મેરેથોન દોડના સફળ આયોજન માટે જે.સી.આઈ. પ્રમુખ શ્રી અમીત પટેલ, પ્રોજેક્ટ ચેરમેન જીજ્ઞાશાબેન પંચાલ અને હેરંબા ઈન્ડસ્ટ્રીઝના ઉદ્યોગપતિ શ્રી સદાશીવ શેટ્ટી જેવા મહાનુભાવોએ જહેમત ઉઠાવી હતી.
