કાપડની થેલી અડધી કિંમતમાં વિતરણ : થેલી પરત આપો તો પૈસા પરત આપવામાં આવે છે
(વર્તમાન પ્રવાહ વાપી બ્યુરો)
વાપી, તા.22: વલસાડમાં ઉમિયા સોશિયલ ટ્રસ્ટ દ્વારા પ્લાસ્ટિક મુક્ત અભિયાનનો નવતર પ્રયોગ શરૂ કરવામાં આવ્યો છે. સીંગલ યુઝ પ્લાસ્ટિક વપરાશ અટકાવવા ટ્રસ્ટ દ્વારા કપડાની થેલીઓ અડધી કિંમતે આપવામાં આવે છે. કામ પત્યા પછી થેલી પરત આપો તો ખરીદ કિંમત પરત આપવામાં આવે છે. આ અભિયાનને ભારે પ્રતિસાદ મળી રહ્યો છે.
સરકાર સિંગલ યુઝ પ્લાસ્ટિક થેલી ઝભલાના ઉપયોગ ઉપર પ્રતિબંધ મુક્યો છે. એડવાઈઝરી પણ જારી કરેલ છે તેથી વલસાડમાં ઉમિયા સોશિયલ ટ્રસ્ટ દ્વારા કપડા થેલી અડધી કિંમતે વિતરણ કરાઈ રહી છે. 20 રૂા. થેલી હોય તો માત્ર 10 રૂા.માં આપવામાં આવે છે. બીજુ ખાસ એ છે કે વપરાશ બાદ થેલી પરત આપો તો ખરીદ કિંમત પાછી આપવામાં આવે છે. આ નવતર અભિયાનનો ભારે પ્રતિસાદ મળી રહ્યો છે. શહેરમાં 10 હજાર ઉપરાંત થેલી વેચાણ થઈ છે. જેથી વલસાડ શહેર પ્લાસ્ટિક મુક્ત શહેર બનવા તરફી આગળ વધી રહ્યું છે. પરંતુ ઉલ્લેખનીય છે કે, વલસાડ શાકભાજી માર્કેટમાં પ્રતિબંધ હોવા છતાં સિંગલ યુઝ પ્લાસ્ટિકથેલીઓનો ખુલ્લેઆમ ઉપયોગ થઈ રહ્યો છે.
