ધુળેટી મનાવ્યા બાદ મિત્રો જોડે પાર નદીમાં નાહવા જતાં ડૂબી જવાથી મોત
(વર્તમાન પ્રવાહ ન્યુઝ નેટવર્ક)
પારડી, તા.26: પારડીના રાણા સ્ટીટમાં રહેતો જીગર સતિષભાઈ રાણા દુબઈ ખાતે કામકાજ કરતો હોય હાલમાં જ ત્રણથી ચાર મહિના પહેલા ભારત ખાતે આવ્યો હતો. પોતાના ખંતિલા અને કામ કરવાના સ્વભાવને લઈ ઘરે બેસી ન રહેતા હાલમાં દમણ ખાતે નોકરી કરી રહ્યો હતો.
આજરોજ આજુબાજુના મિત્રો જોડે હરસોલ્લાસ અને મજાક મસ્તીથી ધુળેટી રમ્યા બાદ તમામ મિત્રો પાર નદી ખાતે ગયા હતા. જ્યાં પાર નદીમાં નાહવા જતા ડૂબી જવાની લઈ તેનું કરુણ મોત થતા સમગ્ર રાણા સમાજમાં દુઃખનું મોજું ફરી વળ્યું હતું.
પાર નદી ખાતે હાજર ચંદ્રપુરના તરવૈયાઓએ ડૂબી રહેલ જીગરને તાત્કાલિક પાણીમાંથી બહાર કાઢી બચાવવાના પ્રયત્નો કર્યા હતા અને સ્થળ પર પહોંચેલ 108 ની ટીમ પણ પમ્પિંગ દ્વારા શ્વાસ પાછા આવે એવા પ્રયત્ન કર્યા હતા પરંતુ આ તમામ પ્રયત્નો નિષ્ફળ જતા જીગરનું કરુણ મોત થયું હતું.
