1992 થી દયાનંદ મેવાલાલ દુબે ફરાર હતો: અંતે હરિયાણાથી એસ.ઓ.જી. ઊંચકી લાવી
(વર્તમાન પ્રવાહ વાપી બ્યુરો)
વાપી, તા.06: વાપી જી.આઈ.ડી.સી. પોલીસ દફતરે અફીણનો જથ્થો રાખનાર આરોપી સેકન્ડ ફેઝમાં એક રૂમની ચાલીમાંથી 1992માં રેડ દરમિયાન પોલીસ ઝડપે તે પહેલા ફરાર થઈ ગયો હતો તે સમયે આરોપી 28 વર્ષનો હતો. હાલમાં હરિયાણાથી એસ.ઓ.જી.એ ઝડપ્યો ત્યારે આરોપી 58 વર્ષનો થઈ ગયો હતો.
વાપી જી.આઈ.ડી.સી. પોલીસે ગત 1992માં સેકન્ડ ફેઝમાં એક ચાલીમાં રેડ પાડી હતી. કેમિકલ કંપનીના કમ્પાઉન્ડની રૂમોમાંથી કાર્યવાહી દરમિયાન પ્રદ્યુમ્ન દુબે ઝડપાયો હતો તેની પાસે એક તોલો અફીણનો જથ્થો મળ્યો હતો. વધુ પૂછપરછમાં તેણે જણાવેલ કે જથ્થો કાકાના દિકરા દયાનંદ મેવાલાલ દુબેએ આપેલો ત્યારે પોલીસ ધરપકડથી બચવા માટે મેવાલાલ ફરાર થઈ ગયો હતો. ત્યારથી પોલીસ એન.ડી.એસ. ગુનાના આ આરોપીને શોધતી હતી. મધ્યપ્રદેશથી લઈ અનેક જગ્યાએ પોલીસ તપાસમાં જતી પણ ખાલી હાથે પરત આવતી હતી. અંતે પોલીસને આરોપી હરિયાણામાં હોવાની બાતમી મળતા એસ.ઓ.જી.ની ટીમ દયાનંદ મેવાલાલ દુબેને ઊંચકી લાવી હતી. વધુ તપાસ કરવામાં આરોપીને જી.આઈ.ડી.સી. પોલીસને સોંપ્યો હતો. એટલે કે કાનૂન કે હાથ બડે લમ્બે હોતે હૈ તે આને કહેવાય.