લોભામણી સ્કીમો આદિવાસી વિસ્તારમાં બતાવી આયોજકો છૂ થઈ જતા ધરમપુર પોલીસને આવેદનપત્ર પાઠવાયું
(વર્તમાન પ્રવાહ વાપી બ્યુરો)
વાપી, તા.21: ધરમપુર સહિત દક્ષિણ ગુજરાતના ગરીબ આદિવાસીઓને ડ્રીમ-900 અને ઈગલ સ્માર્ટ નામની કંપની દ્વારા ગેરમાર્ગે દોરીને મૂડીરોકાણ કરવાની લોભામણી સ્કીમ બતાવી કરોડો રૂપિયાની છેતરપીંડી કરી જનારાઓ વિરૂધ્ધ આજે શુક્રવારે તા.પં. અપક્ષ સભ્ય કલ્પેશ પટેલની આગેવાની હેઠળ સેંકડો લોકો રેલી આકારે પોલીસ સ્ટેશન પહોંચ્યા હતા. આવેદનપત્ર પાઠવીને ન્યાય અપાવવાની માંગણી કરવામાં આવી હતી.
દક્ષિણ ગુજરાતના મોટાભાગના તાલુકાઓ તથા દાદરા નગર હવેલી વિસ્તારમાં ગરીબ આદિવાસીઓને ડ્રીમ-900 અને ઈગલ સ્માર્ટ કંપનીમાં નાણા રોકવાની લાલચો અપાઈ હતી. જેમાં અનેક લોકોએ નાણા રોક્યા છે. જેનો આંકડો કરોડોમાં થાય છે. થોડા સમય પછી કંપની સંચાલકોછૂ થઈ જતા લોકો સાથે છેતરપીંડી થયાનો અહેસાસ થયો હતો તેથી આજે શુક્રવારે તા.પં. અપક્ષ સભ્ય કલ્પેશ પટેલની આગેવાની હેઠળ ધરમપુર પ્રાંત અને પોલીસ સ્ટેશનમાં આવેદનપત્ર પાઠવી ન્યાય માટેની માંગણી કરી હતી. ન્યાય નહી મળે તો આગામી સમયે આંદોલન કરવામાં આવશે તેવી ઉપસ્થિતોએ માંગણી કરી હતી.
