અદાણી ગેસની ડીલરશીપ મેળવવા સંકેત રાજેન્દ્ર શાહે કરેલ ટ્રાન્જેકશન ફ્રોડ સાબિત થતા સાઈબર ક્રાઈમ પો.સ્ટે.માં ફરિયાદ નોંધાવી
(વર્તમાન પ્રવાહ વાપી બ્યુરો)
વાપી, તા.09
આજકાલ ઓનલાઈન ફ્રોડના વારંવાર કિસ્સા પ્રકાશમાં આવતા રહે છે. તેવો વધુ એક બનાવ વાપીના વેપારી સાથે બન્યો છે. એક બોગસ વેબસાઈટ ઉપર અદાણી ગેસની ડિલરશીપ મેળવવા જુદા જુદા તબક્કામાં રૂા.94 લાખનું ટ્રાન્જેકશન કર્યા બાદ ખબર પડી કે આ બોગસ વેબસાઈટ છે તેથી વેપારીએ વલસાડ સાઈબર ક્રાઈમ પોલીસ સ્ટેશનમાં ફરિયાદ નોંધાવી છે.
પ્રાપ્ત વિગતો પોલીસ સુત્રો મુજબ વાપીમાં રહેતા સંકેત રાજેન્દ્રભાઈ શાહએ ઓનલાઈન સરફીંગ કરતા એક વેબસાઈટ ઉપર અદાણી ગેસની ડિલરશીપની વિગતો હતી તેથી સંકેતભાઈએ વેબસાઈટની વિગતો મુજબ ફોર્મ ભરીને સામેથી જે જે માંગણી થતી હતી તેમ અલગ અલગ વખતે કુલ રૂા.94 લાખનું ટ્રાન્જેકશન આર.ટી.જી.એસ.ના માધ્યમથી કરતા રહેલા. અંતમાં આખી વેબસાઈટ જ બોગસ હોવાનું માલુમ પડતા તેઓ સાઈબર ક્રાઈમનો ભોગ બનતા વલસાડ સાઈબર ક્રાઈમ પોલીસ સ્ટેશનમાંસંકેત શાહે ફરિયાદ નોંધાવી છે. ફરિયાદ બાદ સાઈબર પો.સ્ટે.ના પી.આઈ. ચૌધરીએ વધુ તપાસ હાથ ધરી છે. પોલીસે જણાવ્યું હતું કે, ઓનલાઈન ખરીદી કે ટ્રાન્જેકશન કરતા પહેલાં સતર્કતા દાખવવી જરૂરી છે જેથી સાઈબર ક્રાઈમના ભોગ ના બની શકાય.
