એલ.સી.બી.એ ફરિયાદ બાદ ગેંગનો એક આરોપી યુસુફ ઉર્ફે ચાચા સતારામ મેમણ મહુવાની ધરપકડ કરી 37 લાખ રિકવર કર્યા
(વર્તમાન પ્રવાહ વાપી બ્યુરો)
વાપી, તા.26: લોભીયા હોય ત્યાં ધુતારા ભુખે ના મરે એ યુક્તિ ધરમપુરમાં સાબિત થઈ છે. સોનાના બિસ્કીટ રસ્તા પર લેવાની લાલચમાં ધરમપુરના બંગલામાં મીટિંગ ગોઠવાયેલી હતી ત્યાં ગાંધીનગરની ડુપ્લીકેટ પોલીસ ત્રટકી અને રોકડા 37 લાખ અને સોનાના બિસ્કીટ લઈ ફરાર થઈ ગઈ હતી. બાદમાં ચીખલી હાઈવે ઉપર હોટલ પાસે 2 લાખ કેસ પતાવવાના રોકડ લઈ ગેંગ રફુતૉચકક્ર થઈ હતી. ભોગ બનેલાઓએ ધરમપુર પો.સ્ટે.માં ફરિયાદ નોંધાવ્યા બાદ એલ.સી.બી.એ. ગુનાનો ભેદ ઉકેલી રોકડા રૂા.37 લાખ સાથે ગેંગના આરોપીને દબોચી લીધો છે.
ઘટનાની પોલીસ સુત્રો પાસેથી પ્રાપ્ત મળેલ વિગતો મુજબ વાપી ખોજા સોસાયટીમાં રહેતા અમીન અકબર લાખાણીને બે માસ પહેલાં દમણના મિત્ર રાજુએ રસ્તામાં સોનાના બિસ્કીટઆપવાનું કહી વિશ્વાસમાં લઈ બાદમાં સોહિલ હિરાનીએ ઓળખીતા આરીફ ઉર્ફે રાજુ તથા યુનુસ ઉર્ફે યુસુફ ચાચાને પ્રવિણ છગન સાથે મીટિંગ કરાવી હતી. તેમાં સોનાની ખરી બિસ્કીટ બતાવેલી તેથી અમીન લાખાણી સાથે ગત તા.17 ડિસેમ્બરે સોહિલ આરીફ, વિજય બારસોલ ધરમપુરમાં રહેતા પ્રવિણ છગનના બંગલામાં બેઠક કરી હતી. અમીન લાખાણી રોકડા રૂપિયા 37 લાખ લાવેલો હતો તે દરમિયાન એક મહિલા સહિત છ ઈસમો ગાંધીનગરની ડુપ્લીકેટ પોલીસ બની ત્રાટક્યા હતા અને ધાક આપી રોકડા 37 લાખ સોનુ લઈ કારમાં ફરાર થઈ ગયા હતા. ભોગ બનનાર અમીન લાખાણીએ 23 ડિસેમ્બરે ધરમપુર પોલીસમાં ફરિયાદ નોંધાવતા એલ.સી.બી.એ ગણતરીના દિવસોમાં લૂંટારુ ગેંગના એક આરોપી યુસુફ ઉર્ફે ચાચા અત્તારામ મેમણ રહે.મહુવા ભાવનગરને દબોચી લઈને રૂા.37 લાખ રોકડા પોલીસે રિકવર કર્યા છે. અન્ય આરોપી આરીફ ઉર્ફે રાજુ, પ્રવિણ છગન, વિજયભાઈ, ઈશ્વરભાઈ અને એક મહિલાની શોધ ચાલુ છે. ઝડપાયેલ આરોપી છ ગુનામાં પકડાયેલો છે. ધરમપુર, વાંસદા, વલસાડ રૂરલમાં આરોપીના ગુના નોંધાયેલા છે.
