આગના વિકરાળ સ્વરૂપથી પાસેના ઝાડ બળીને ખાખ થઈ જતા પક્ષીઓ સહિત પર્યાવરણનો ખુરદો બોલી ગયો
(વર્તમાન પ્રવાહ વાપી બ્યુરો)
વાપી, તા.18: કપરાડાના નાનાપોંઢા ગામે કોલક નદીને કિનારે ગેરકાયદેધમધમતા ભંગારના ગોડાઉનમાં રવિવારે રાત્રે ભિષણ આગ લાગી હતી. આગમાં ગોડાઉન આખું બળીને ખાખ થઈ ગયું હતું. આગના બનાવને લઈ સમગ્ર વિસ્તારમાં અફરા તફરી મચી જવા પામી હતી.
નાનાપોંઢા વિસ્તારમાં કોલક નદી કિનારે કાર્યરત ભંગારના ગોડાઉનમાં રવિવારે રાત્રે અચાનક અભિષણ આગ લાગી હતી. આગ બુઝાવવા માટે ધરમપુર તથા વાપીથી ફાયર ફાઈટરો ઘટના સ્થળે પહોંચી ગયા હતા. અસંખ્ય ગ્રામ્યજનો પણ એકઠા થઈ ગયા હતા. પરંતુ આગને બુઝાવવામાં નિષ્ફળતા મળી હતી. આ આગમાં પાસે આવેલા વૃક્ષો પણ બળીને ખાખ થઈ ગયા હતા. પક્ષીઓને પણ ભારે હાની પહોંચી હતી. આગને લઈ પર્યાવરણનું ભારે નુકશાન પહોંચ્યું હતું. નાનાપોંઢા જેવા અંતરિયાળ વિસ્તારોમાં કોઈપણ રોકટોક વગર ગેરકાયદે ભંગારના ગોડાઉનો ધમધમી રહ્યા છે ત્યારે આવા ગોડાઉનો ઉપર કાયદાનો કોરડો વિંઝાવો જોઈએ તેવું સ્થાનિકો ઈચ્છી રહ્યા છે.