મથુરા પોલીસે લૂંટ ધાડ જેવા ગુનાઓમાં સંડોવાયેલ આરોપી માટે રૂા. 2પ હજારનું ઈનામ જાહેર કર્યું હતું
(વર્તમાન પ્રવાહ ન્યુઝ નેટવર્ક)
ચીખલી (વંકાલ), તા.12: ચીખલી તાલુકાના ખુંધ ગામનાં ખાડા વિસ્તારમાં છેલ્લા 20 વર્ષથી પરિવાર સાથે રહેતો મહંમદ રફીક નથ્થુખાન (ઉ.વ-55) (મૂળ રહે. સાહાચોખા ગામ, પુનહાના થાના મેવાડ હરિયાણા) કે જે વર્ષ 2000માં ચોરી, ધાડ, લૂંટ જેવા અનેક ગુનાઓમાં સંડોવાયેલ હોય ઉત્તરપ્રદેશના મથુરા પોલીસ મથકમાં તેને વોન્ટેડ જાહેર કરી યુપી પોલીસ દ્વારા તેના માથે રૂા.25,000/-નું ઈનામ જાહેર કરાયું હતું. યુપી પોલીસને ચકમો આપી ત્યાંથી ફરાર થઈ ને તે ખૂંધના ખાડા વિસ્તારમાં વસવાટ કરી રહેણાંકના પુરાવાઓ પણ મેળવી લીધા હતા અને અહીં ટ્રક ટ્રાન્સપોર્ટનો વ્યવસાય કરતો હતો. જેને ટેકનિકલ સાધનોનો ઉપયોગ કરી મથુરા સાતા પોલીસ મથકના પીએસઆઈ રાજકુમાર સિંગ તથા તેજપાલસિંગ સહિતના સ્ટાફ દ્વારા નિગરાણી રાખી સ્થાનિક પોલીસની મદદથી ઝડપી લીધો હતો.
ખૂંધના ખાડા વિસ્તારમાં અનેક પરપ્રાંતિયો વસવાટ કરે છે અને આ વિસ્તાર અસામાજિક તત્વો માટે જાણે સ્વર્ગસમાન બની જવા પામેલ છે. ત્યારેસ્થાનિક પોલીસ દ્વારા પણ સમયાંતરે કોમ્બિંગ હાથ ધરી રહેણાંક, ઓળખના પુરાવાઓ વિગેરેની ચકાસણી કરે તે જરૂરી જણાઈ રહ્યું છે.
