પ્રણેશભાઈ શાહએ પોલીસમાં ફરિયાદ કરી હતી : પોલીસે બન્ને પક્ષોને શાંતિ જાળવવાની અપીલ કરી
(વર્તમાન પ્રવાહ વાપી બ્યુરો)
વાપી, તા.12: વાપી ઈમરાનનગર વિસ્તારના ગોદાલનગરમાં આવેલ ક્રિકેટ ગ્રાઉન્ડમાં આજે રવિવારે ક્રિકેટને લઈ બબાલ ઉભી થઈ હતી. સેવા નિવૃત્ત નાગરિકની ફરિયાદ બાદ ટાઉન પોલીસએ ક્રિકેટ અટકાવી હતી.
વાપી ગોદાલનગરમાં આવેલ ક્રિકેટ ગ્રાઉન્ડમાં રવિવારે ક્રિકેટને લઈ મામલો બિચકાયો હતો. સેવા નિવૃત્ત પ્રણેશભાઈ શાહે વાપી ટાઉન પોલીસમાં ક્રિકેટ વિરૂધ્ધ ફરિયાદ કરતા ટાઉન પોલીસે ક્રિકેટ અટકાવી હતી. મામલા બાદ અહીંના સ્થાનિક અગ્રણી અહમદ ખાન ટાઉન પોલીસ સ્ટે. દોડી ગયા હતા અને તેમણે પોલીસને સાચી હકિકતો જણાવી હતી કે આ ગ્રાઉન્ડ ઉપર છેલ્લા 25 વર્ષથી બાળકો ક્રિકેટ રમે છે. અગાઉ પણ આવી ફરિયાદ થયેલી ત્યારે પી.આઈ. સરવૈયા ગ્રાઉન્ડ ઉપર આવ્યા હતા. તેમને પણ સ્થિતિથી વાકેફ કરાયા હતા. અહમદ ખાનનું કહેવું છે કે, અત્યારે ત્રીજી પેઢી રમી રહી છે. વર્ષોથી આ મેદાનનો ઉપયોગ થઈ રહ્યો છે. જમીન માલિકને કોઈ મુશ્કેલી નથીછતાં અવાર-નવાર ક્રિકેટના મુદ્દે કોઈને કોઈ વાદ-વિવાદ ઉભા થતા રહે છે. પોલીસે બન્ને પક્ષોને શાંતિ જાળવી રાખવાની અપીલ કરી હતી.