(વર્તમાન પ્રવાહ વાપી બ્યુરો)
વાપી, તા.15: ભાજપ મહિલા મોરચા વલસાડ જિલ્લા દ્વારા રોફેલ એમ.બી.એ. કોલેજ, ગુંજન, જીઆઈડીસી વાપી ખાતે આંતરરાષ્ટ્રીય મહિલા દિનના ઉપલક્ષમાં ‘સુષ્મા સ્વરાજ એવોર્ડ’ કાર્યક્રમ પ્રદેશનીસૂચના અનુસાર યોજવામાં આવ્યો હતો. આ કાર્યક્રમમાં સમાજમાં વિવિધ ક્ષેત્રે વિશિષ્ટ સેવાકીય યોગદાન આપનાર મહિલાઓને ‘સુષ્મા સ્વરાજ એવોર્ડ’ આપી સન્માનિત કરવામાં આવી હતી.
વાપી રોફેલ કોલેજમાં યોજાયેલ સન્માન કાર્યક્રમમાં વાપી નગરપાલિકા પ્રમુખ કાશ્મિરાબેન શાહ, બી.જે.પી. મહિલા મોરચા જિલ્લા મહામંત્રી ગીતાબેન પટેલ છીરી પંચાયતના ડે.સરપંચ અરૂણાબેન દેસાઈ, ફાલ્ગુનીબેન મહારાજ સહિત ભાજપ મહિલા મોરચાની બહેનો ઉપસ્થિત રહી હતી. પાલિકા પ્રમુખ કાશ્મિરાબેન શાહના હસ્તે મેરેથોન ગલ્સ માધુરી પ્રસાદને શિલ્ડ આપી સન્માન કરાયું હતું. સુષમા સ્વરાજ એવોર્ડ સમાજમાં ખાસ વિશિષ્ટ મહિલા પ્રતિભાઓને એનાયત કરવામાં આવે છે તે માટે મેરેથોન ગલ્સ માધુરી પ્રસાદની પસંદગી કરવામાં આવી હતી.
ઉપરોક્ત કાર્યકમમાં જિલ્લા મહિલા મોરચાનાં પ્રમુખ પ્રવિણાબેન પટેલે સ્વાગત પ્રવચન કરેલ, મહામંત્રી ગીતાબેન પટેલ, વાપી ન.પા. પ્રમુખ કાશ્મીરાબેન શાહ, એડવોકેટ રશ્મિકાબેન વિગેરેએ પ્રાસંગિક ઉદબોધન કરેલ, અરુણાબેન પટેલ, સહિત મહિલા મોરચાનાં પદાધિકારીઓ, સહિત ખૂબ મોટી સંખ્યામાં મહિલાઓ ઉપસ્થિત રહી કાર્યકમને સફળ બનાવેલ, આભારવિધિ મહામંત્રી અલકાબેન દેસાઈ કરી હતી.
