મામાભાચા, ગડી, બિલધા, જામલીયા જેવા અંતરિયાળ વિસ્તારો પર મેઘ તૂટી પડતા કાળઝાળ ગરમીમાં ઠંડક પ્રસરાઈ ગઈ
(વર્તમાન પ્રવાહ વાપી બ્યુરો)
વાપી, તા.11: હવામાન વિભાગની છેલ્લા 15 દિવસથી કમોસમી વરસાદ થવાની નિરંતર ચાલી રહેલી આગાહીઓ અનુસાર સોમવારે સાંજે ધરમપુર તાલુકાના અંતરિયાળ ગામોમાં ભારે પવનના સુસવાટા, ગાજવીજ સાથે કમોસમી વરસાદ વરસ્યો હતો.
ભર ઉનાળામાં ચોમાસાનો અહેસાસ વરસાદે કરાવ્યો હતો. છેલ્લા બે દિવસ ધરમપુર વિસ્તારમાં કાળઝાળ ગરમી પડી રહી હતી. દઝાડે તેવો તડકો હતો ત્યાં અચાનક સોમવારે વાતાવરણમાં પલટો આવતાં સાંજે વિજળીના કડાકા ભડાકા સાથે ભારે પવનો વચ્ચે વરસાદ વરસ્યો હતો. જો કે ખેતીવાડીને નુકશાનકર્તા બની રહેલ આ વરસાદને લઈ વાતાવરણમાં ઠંડક પ્રસરાઈ જતા લોકોને રાહત અનુભવવા મળી હતી. જો કે વલસાડજિલ્લામાં કમોસમી વરસાદ અવાર નવાર આ વર્ષે પડતો જ રહ્યો છે તેમુજબ સોમવારે મામાભાચા, ગડી, બિલધા જામલીયા જેવા ધરમપુરના અંતરિયાળ ગામોમાં વધુ વરસાદ પડયો હતો. લોકો બહાર નિકળેલા પાછા ઘરે ફરવા દોડી ગયા હતા. જો કે વર્તમાનનો કમોસમી વરસાદ શાકભાજી, કઠોળ, કેરી પાક ઉપર નભતા ખેડૂતો માટે ચિંતાનો વિષય જરૂર બન્યો હતો.
