વલસાડ જિલ્લાની 281 પોસ્ટ ઓફિસમાં અંદાજીત 1.69 લાખ ખાતેદારોને અસર પહોંચી
(વર્તમાન પ્રવાહ વાપી બ્યુરો)
વાપી, તા.23: વલસાડ જિલ્લા સહિત રાજ્યમાં કાર્યરત પોસ્ટ ઓફિસ બેંકિંગ સિસ્ટમના ફિનાકલ સોફટવેરમાં છેલ્લા બે દિવસથી ક્ષતિ સર્જાતા લાખો ખાતેદારો મુંઝવણમાં મુકાઈ જવા પામ્યા છે.
પોસ્ટ ઓફિસ બેંકિંગ સેવા લોકોનો જનાધાર છે. વલસાડજિલ્લામાં આવેલી કુલ 281 પોસ્ટ ઓફિસમાં છેલ્લા બે દિવસથી ફિનાકલ સોફટવેરમાં ક્ષતિ સર્જાઈ છે. પરિણામે પોસ્ટમાં પૈસા ઉપાડવા માટે આવતા ગ્રાહકો પૈસા ઉપાડી શકતા નથી. ક્યાંક તો કેટલાક પરિવારો માત્ર પોસ્ટમાં જ બેંકિંગ ખાતુ ધરાવતા હોય છે. તેવા કેટલાક ગ્રાહકો દવા કે હોસ્પિટલ જેવા અગત્યના કામ હેતુસર પોસ્ટમાં પૈસા ઉપાડવા માટે ગયા હતા તેમને નિરાશા સાંપડી હતી. પોસ્ટ ખાતેદારોની સાથે સાથે પોસ્ટ કર્મચારીઓ પણ સોફટવેરમાં સર્જાયેલી ટેકનિકલ ક્ષતિના કારણે હેરાન પરેશાન થઈ રહ્યા છે. જિલ્લાની કુલ 281 પોસ્ટ ઓફિસોમાં અંદાજીત 1.69 લાખ જેટલા લોકો પોસ્ટમાં બેંકિંગ ખાતા ધરાવે છે. તેવા ગ્રાહકો અતિ મુસિબતમાં મુકાઈ ગયેલા જોવા મળે છે. પોસ્ટમાં ગ્રાહકોની કતારો ઉભી થઈ છે પરંતુ તેમના નાણાકીય કામકાજ અટવાઈ જતા ચોમેર નિરાશા ઉભી થઈ છે. સોફટવેરની ટેકનિકલ ખામી છેલ્લા બે દિવસથી ચાલી રહી છે.
