(વર્તમાન પ્રવાહ ન્યુઝ નેટવર્ક)
પારડી, તા.19: છેલ્લા કેટલાક દિવસથી સમગ્ર પારડી વિસ્તારમાં ગરમીનો પારો ઊંચો જતા અસહ્ય ગરમીને લઈ લોકો ત્રાહિમામ પોગારી પોકારી ઊઠ્યા હતા. આજરોજ હવામાન અચાનક પલટી મારતા બપોરે ગાજવીજ સાથે વરસાદ આવતા સમગ્ર વાતાવરણમાં ઠંડક પ્રસરી ગઈ હતી અને ઘણા સમય બાદ લોકોને ગરમીમાં રાહત મળી હતી.
એક બાજુ આમ આદમી વાતાવરણ બદલાતા અસહ્ય ગરમીને લઈ રાહત અનુભવતો હતો જ્યારે જગતનો તાત ખેડૂતની હાલત વધારે કફોડી બની જવા પામી હતી. કારણકે અગાઉ આવેલ હવામાનને લઈ કેરીના પાકને ખૂબ નુકસાન પહોંચ્યું હતું. આ નુકસાનનું સર્વે થયું છે પરંતુ તેનો સંપૂર્ણ રિપોર્ટ તૈયાર થયો નથી ત્યાં ફરીથી આજ રોજ ગાજવીજ અને વાવાઝોડા સાથે પડેલા વરસાદને લઈ બાકી રહેલ કેરીના પાકને પણ નુકસાન થતા કેરીનો પાક સંપૂર્ણપણે નિષ્ફળ જતા ખેડૂત બેહાલ બન્યો છે.
