જુનો કોન્ટ્રાક્ટ રૂા.7.94 કરોડનો હતો તે પણ સ્વભંડોળ થકી હતો : નવો કોન્ટ્રાક્ટ ગ્રાંટમાંથી અપાયો
(વર્તમાન પ્રવાહ વાપી બ્યુરો)
વાપી, તા.10: વાપી નગરપાલિકા વિસ્તારમાં પાલિકા મહત્ત્વની ભૂમિકા સ્વચ્છતાની છે. શહેરને સ્વચ્છ નિર્મળ રાખવા માટે ક્યાંક પાલિકા વહિવટી તંત્ર ઉણું ઉતરતું જોવા મળે છે પરંતુ એ તમામ ક્ષતિઓ દૂર કરીને પાલિકાએ સફાઈ માટે નવા કોન્ટ્રાક્ટરનીનિમણૂંક કરી રૂા.7.25 કરોડમાં શહેરની સફાઈનો કોન્ટ્રાક્ટ અપાયો છે.
કારોબારી ચેરમેન મિતેશભાઈ દેસાઈના જણાવ્યા અનુસાર વાપી પાલિકા વિસ્તારનો સફાઈ કોન્ટ્રાક્ટ સ્વચ્છતા કોર્પોરેશનને રૂા.7.24 કરોડનો અપાયો હતો. પાલિકા માટે લેવાયેલ આ નિર્ણયથી પાલિકાને ઘણો ફાયદો થશે. કારણ કે જુનો કોન્ટ્રાક્ટ સ્વભંડોળથી અપાયો હતો જ્યારે નવો ગ્રાન્ટમાંથી અપાયો છે. તેમજ પહેલાં 240 લેબરનો સ્ટાફ કાર્યરત હતો હવેથી 365 લેબર સફાઈ કામકાજ કરશે તેમજ જુના કોન્ટ્રાક્ટર પાસે બ્રુમિંગ મશીનની સુવિધા નહોતી, નવા કોન્ટ્રાક્ટમાં બ્રુમિંગ મશીનની સુવિધા પણ છે. રાત્રીના સમયમાં મશીન કામગીરી કરશે. નવિન સફાઈ કોન્ટ્રાક્ટનો નિર્ણય પાલિકાના અમુક વર્ગને અનુકૂળ નથી આવ્યો. કારણ કે ભાગ બટાઈનો છેદ ઉડી ગયો છે. પાલિકા સ્વભંડોળમાં ખર્ચ પડવાનો નથી. ગ્રાન્ટમાંથી કોન્ટ્રાક્ટ અપાયો છે તેનું દુઃખ પણ અમુકને થઈ રહ્યું છે.
