શ્રમિક માતા-પિતા ઈંટના ભઠ્ઠા પર કામ કરતાં હતા ત્યારે બાળકી પાણી ભરેલ ડોલ સાથે રમતા બની ઘટના
(વર્તમાન પ્રવાહ ન્યુઝ નેટવર્ક)
પારડી, તા.14: માતા-પિતા માટે લાલ બત્તી સમાન કિસ્સો પ્રકાશમાં આવ્યો છે. જેમાં પારડી તાલુકાના નાના વાઘછીપા ગામે મૂળ મહારાષ્ટ્ર દહાણું તાલુકાના અસવેરા ગામનું ગરીબ શ્રમિક પરિવાર જયદેવભાઈ લક્ષ્મણભાઈ ઘોરખના અને તેમની પત્ની મંજુબેન ઈંટના ભઠ્ઠા પર કામ કરી રહ્યા હતા ત્યારે તેમના ચાર સંતાનો નજીકમાં રમી રહ્યા હતા. ચાર સંતાનો પૈકી એક દોઢ વર્ષની દીકરી નક્ષેત્રા રમતા રમતા પાણી ભરેલી ડોલમાં ઊંધી પડી જતાં માથું પાણી ભરેલ ડોલમાં ડુબતા બાળકી પાણી પી જતા મોતને ભેટી હતી. જમવાના સમયે બાળકી ન દેખાતા મોટી છોકરીના કહેવાથી બાળકીને પાણી ભરેલ ડોલમાં ઊંધી પડેલી જોઈ પરિવારે તેને બહાર કાઢી ઈંટના ભઠ્ઠાના માલિક ઈશ્વરભાઈની કારમાં સારવાર માટે પારડી મોહન દયાલ હોસ્પિટલ ખાતે લાવતા ફરજ પરના ડોક્ટરે મૃત જાહેર કરી હતી. પારડી પોલીસે સી.એચ.સી. ખાતે પી.એમ. કરાવી વધુ કાર્યવાહી હાથ ધરી છે.
