તણસીયા નવીનગરી ફળીયામાં રહેતો વિપુલ રમણભાઈ પરવાડીયાનું સારવાર દરમિયાન વલસાડ સિવિલમાં મોત
(વર્તમાનપ્રવાહ વાપી બ્યુરો)
વાપી, તા.01: ધરમપુરના ધસારપાડા ચોકડી પાસે બે બાઈક સામસામે ભટકાતા ગમખ્વાર અકસ્માત સર્જાયો હતો. અકસ્માતમાં એક બાઈક સવાર યુવાનનું સારવાર દરમિયાન મોત નિપજતા પરિવારમાં ઘેરા શોકની લાગણી ફેલાઈ જવા પામી હતી.
ધરમપુરના તણસીયા નવીનગરી ફળીયામાં રહેતો વિપુલ રમણભાઈ પરવાડીયા ઉ.વ.25 શનિવારે પોતાની બાઈક નં.જીજે 15 3852 લઈને ધરમપુર વાંકલ ગામે ગયો હતો. કામ પતાવી ઘરે જવા નિકળેલ ત્યારે ધસારવાડા ચોકડી પાસે સામેથી આવી રહેલ બાઈક સાથે બાઈક ભટકાતા વિપુલ નીચે પટકાતા ગંભીર હાલતમાં ધરમપુર સ્ટેટ હોસ્પિટલમાં ખસેડાયો હતો. ત્યાંથી વધુ સારવાર માટે વલસાડ સિવિલ હોસ્પિટલમાં ખસેડાયેલ. જ્યાં સારવાર દરમિયાન રવિવારે વિપુલનું કરુણ મોત નિપજ્યું હતું. પરિવારના યુવાન પૂત્રનું અકાળે મોત નિપજતા ઘેરા શોકની લાગણી ફેલાઈ જવા પામી હતી.
