પોલીસ જાપ્તો જોઈ ચાલક ટેમ્પો મુકી ભાગી ગયો : ક્લિનર પકડાઈ ગયો
(વર્તમાન પ્રવાહ વાપી બ્યુરો)
વાપી, તા.29: વાપી બલીઠામાં ગતરોજ પ્લાસ્ટીક વેસ્ટની આડમાં દારૂનો જથ્થો ભરીને સુરત તરફ જઈ રહેલો ટેમ્પો એલ.સી.બી.એ ઝડપી પાડયો હતો. પોલીસે રૂા.3.43 લાખનો દારૂનો જથ્થો જપ્ત કર્યો હતો.
વાપી બલીઠા ગ્રામ પંચાયત કચેરી પાસે એલ.સી.બી.ને મળેલી બાતમી આધારે વોચ ગોઠવી હતી ત્યારે બાતમીવાળો ટેમ્પો નં.જીજે 15 વાયવાય 6079 આવતો હતો ત્યારે પોલીસ જાપ્તો નાકાબંધી જોઈ ચાલક ટેમ્પો છોડીને નાસી ગયો હતો. જ્યારે ક્લિનર પ્રશાંત પાટી-રહે. બારડોલીને પોલીસે પકડી લીધો હતો. ક્લિનરની હાજરીમાં ટેમ્પામાં તપાસ કરાતા ઈંગ્લીશ દારૂની બોટલ નં.1992 નો જથ્થો મળી આવ્યો. દારૂની કિં. રૂા.3.43 લાખ અને ટેમ્પો સહિત પોલીસે રૂા.8.43 લાખનો કુલ મુદ્દામાલ જપ્ત કરી એલ.સી.બી.એ વધુ તપાસ ટાઉન પોલીસને સોંપી હતી. જ્યારે ટેમ્પો ચાલકને વોન્ટેડ જાહેર કર્યો હતો.
