સરપંચ મયુરીબેન પટેલ અને પતિ મુકેશ પટેલ એ.સી.બી.ના છટકામાં રોકડા એક લાખની લાંચ લેતા સપડાયા
(વર્તમાન પ્રવાહ વાપી બ્યુરો)
વાપી, તા.20: વાપી પાસે આવેલ ચંડોર ગામના મહિલા સરપંચ અને તેમના પતિ ફલેટ આકારણી કરવા પેટે રૂપિયા 1 લાખની લાંચ સ્વિકારતા એ.સી.બી.એ ગોઠવેલા છટકામાં રંગે હાથ ઝડપાઈ જતા ચકચાર મચી જવા પામી હતી.
ચંડોર ગામે આવેલ હનુમંત રેસિડેન્સીમાં જાગૃત નાગરિકે ફલેટ રાખ્યા હતા. જેની આકારણી માટે તેઓએ પંચાયતના સરપંચ મયુરીબેન મુકેશભાઈ પટેલ અને તેમના પતિ મુકેશભાઈ ભુલાભાઈ પટેલનો સંપર્ક કર્યો હતો. ફલેટ આકારણી પેટે સરપંચ દંપતિએ રૂા.અઢી લાખની માંગણી કરી હતી. તે આપવા માટે ફરિયાદીએ સંમતિ દર્શવી હતી. પરંતુ હકીકતમાં તેઓ આપવા માગતા નહોતા તેથી એ.સી.બી.માં ફરિયાદ નોંધાવી હતી. એ.સી.બી.એ આગળની પ્રક્રિયા હાથ ધરી હતી. ફરિયાદીએ સરપંચને જણાવેલ કે હાલ 1 લાખની સગવડ થઈ છે, બાકીના પછી આપીશ. તેમ કહીને ને.હા.48 શ્રી ખોડીયાર હોટલમાં રૂપિયા લેવા મુકેશભાઈ પટેલને બોલાવેલ તે પહેલા એ.સી.બી. અધિકારી કે.આર. સક્સેના અને મદદનીસ અધિકારી એ.કે. ચૌહાણએ હોટલના પાર્કીંગમાં છટકું ગોઠવી તહેનાત હતા. ફરિયાદીએ સરપંચ પતિ મુકેશભાઈ પટેલને રોકડા રૂપિયા 1 લાખ આપ્યા તે અંગેની સરપંચ મયુરીબેન સાથે પણ હેતુલક્ષી વાત કરી હતી તેથી એ.સી.બી.માં રંગે હાથ સરપંચ પતિ અને સરપંચ મયુરીબેન પટેલને એરેસ્ટ કરી કાયદેસરની કાર્યવાહી હાથ ધરી હતી. અગાઉ પણ વાપી વિસ્તારના ચાર જેટલા સરપંચ લાંચ લેતા ઝડપાઈ ચુક્યા છે.
