મકાનને ટાર્ગેટ બનાવતા હથિયાર બતાવી પરિવારના સભ્યોને બાનમાં લઈ ઝવેરાત મળી રૂા.2.35 લાખની મચાવેલી લૂંટ
(વર્તમાન પ્રવાહ ન્યુઝ નેટવર્ક)
સરીગામ, તા.05: ભીલાડ નજીકના ઝરોલી છિપવાડ વિસ્તારમાં મધ્યરાત્રીના સમયે ત્રાટકેલા ચાર લૂંટારોએ એક મકાનને ટાર્ગેટ બનાવી રૂપિયા 2.35 લાખની લૂંટ મચાવતા સમગ્ર વિસ્તારમાં ભયની લાગણી ફેલાઈ જવા પામી છે. હિન્દી ભાષી અને અંદાજિત 20 થી 25 વર્ષના મજબૂત બાંધાના ત્રણ અને એક અંદાજિત 30 થી 35 વર્ષનો એમ ચાર લૂટારુઓએ મો ઉપર કાળા કલરનું કાપડ બાંધી રાજકુમાર રામુભાઈ ધોડીયાના ઘરમાં પ્રવેશ કર્યો હતો. અને લાકડાની સીડી વડે પહેલા માળે સૂતેલા રાજુભાઈ અને એમની પત્ની તેમજ પરિવારના સભ્યોનેભર ઊંઘમાંથી જગાડ્યા હતા. લૂંટારૂઓ પાસે બંદૂક જેવું હથિયાર અને લોખંડના સળિયા તેમજ ડિસમિસ વડે હુમલો કરવાની ધમકી બતાવી ઘરમાં રાખેલ રોકડ રકમ તેમજ દાગીનાની માંગણી કરી હતી. રાજુભાઈ અને એમનો પરિવાર ડરી જતા ઘરમાં રાખેલ 11 તોલા સોનાના ઘરેણા અને રૂપિયા 15000 રોકડા તેમજ મોબાઈલ નંગ 3 મળી રૂા.2.35 લાખની લૂંટ કરી ભાગી છુટયા હતા. લૂંટારૂઓ ઘટનાને અંજામ આપી ભાગી છુટયા બાદ પરિવારના સભ્યોએ 100 નંબર ઉપર પોલીસ તંત્રને જાણ કરતા પોલીસનો કાફલો ઘટના સ્થળે ઘસી આવ્યો હતો. લૂંટારુઓનું પગેરૂ શોધવા પોલીસ તંત્રની ટીમે તપાસ હાથ ધરી છે.