(વર્તમાન પ્રવાહ ન્યુઝ નેટવર્ક) સેલવાસ, તા.17
દાદરા નગર હવેલીના સાંસદ શ્રીમતી કલાબેન ડેલકરે સુરંગી પંચાયતની મુલાકાત લીધી હતી. જે દરમ્યાન ગામના રસ્તા પાણી અને લાઈટની મૂળભૂત સમસ્યાઓ છે તે અંગે ગ્રામજનોએ જણાવી હતી. મુખ્યત્વે રોડ પહોળો કરવા બાબતે ચાલી રહેલ પ્રક્રિયામાં ઘણાં લોકોના મકાનો તેમજ દુકાનો તૂટી જવાથી ઘણું જ નુકસાન થયું હોવાના કારણે ગ્રામજનોએ ઉગ્ર રજૂઆત કરી હતી અને સુરંગી ગામના લોકોનું ઓછામાં ઓછુ નુકસાન થાય એવી માંગણી કરી હતી. સાંસદે એમની માંગણીઓને ઉચ્ચ કક્ષાએ રજૂઆત કરવાનું આશ્વાસન આપ્યું હતું. બાદમાં રખોલી પંચાયતના કરાડ ગામે આવેલ પાણી પુરવઠા યોજનાની ફિલ્ટર વોટર પ્લાન્ટની પણ મુલાકાત લીધી હતી. આ અવસરે સાંસદ શ્રીમતી કલાબેન ડેલકર, જિલ્લા પંચાયત પ્રમુખ શ્રીમતી નિશાબેન ભવર, જિ.પં.ના ઉપ પ્રમુખ શ્રી દિપક પ્રધાન સહિત પદાધિકારીઓ તેમજ આદિવાસી વિકાસ સંગઠનના કાર્યકર્તાઓ હાજર રહ્યા હતા.