વિક્રમ વર્માને કંપનીમાં કરંટ લાગતા મોતને ભેટયો, બીજા બનાવમાં સાયકલ સવાર આનંદને ટેમ્પોએ ટક્કર મારી હતી
(વર્તમાન પ્રવાહ વાપી બ્યુરો)
વાપી, તા.30: વાપી જીઆઈડીસીમાં શનિવારે બે અલગ અલગ બનાવોમાં બે કર્મચારીઓ મોતને ભેટયા હતા. પ્રથમ ઘટનામાં પેપરમિલમાં કામ કરતા કર્મચારીને કરંટ લાગતા મોત નિપજ્યું હતું. બીજી ઘટનામાં સાયકલ લઈને જઈ રહેલ કર્મચારીને ટેમ્પોએ અડફેટમાં લેતા તેનું ઘટના સ્થળે કરૂણ મોત નિપજ્યું હતું.
પ્રાપ્ત વિગતો મુજબ વાપી ગજાનંદ પેપર મિલમાં કામ કરતા 22 વર્ષિય વિક્રમ વર્મા મૂળ રહે.યુપી જે માતા-પિતાનુંએકમાત્ર સંતાન હતો, નોકરી કરવા વાપી આવ્યો હતો. ગજાનંદ પેપર મિલમાં હેલ્પરનું કામ કરતા શનિવારે વહેલી સવારે કંપનીમાં કરંટ લાગતા સ્થળ ઉપર જ મોતને ભેટયો હતો. બીજી ઘટનામાં સાયકલ ઉપર મોટાભાઈને ટિફિન આપવા નિકળેલ આનંદરામને આઈસર ટેમ્પો નં.જીજે 15 ઝેડ 5410 ના ચાલકે સાયકલને ટક્કર મારતા યુવાન મોતને ભેટયો હતો. બન્ને ઘટના બાદ પરિવારમાં માતમ છવાયો હતો.
