(વર્તમાન પ્રવાહ ન્યુઝ નેટવર્ક)
વલસાડ, તા.૨૨
વલસાડ જિલ્લાના કપરાડા તાલુકામાં મોટાપોંઢા ખાતે આવેલી શ્રી મુમ્બાદેવી આર્ટસ એન્ડ શ્રીમતી એસ. આર.ચમારિયા કોમર્સ કૉલેજમાં ચર્ચાસભા તથા ગુજરાતી વિભાગના ઉપક્રમે વર્ષા ગીતોના કાર્યક્રમનું આયોજન થયું હતું.
મોટાપોંઢાની કોલેજના ઇન્ચાર્જ આચાર્ય એસ.યુ.પટેલના અધ્યક્ષપણા હેઠળ આયોજિત આ કાર્યક્રમનું સંચાલન ચર્ચાસભાના પ્રમુખ ડૉ. આશાબેન ગોહિલે કર્યું હતું. 30 જેટલાં વિદ્યાર્થીઓની ઉપસ્થિતિ અને 15 વિદ્યાર્થીઓ દ્વારા સુંદર રીતે વર્ષાગીતોનું ગાન તથા પઠન કરાયું હતું. આપણા આદ્યકવિ નરસિંહ મહેતા, બાલમુકુંદ દવે, પ્રહલાદ પારેખ, ઝવેરચંદ મેઘાણી, નાથાલાલ દવે, પ્રદ્યુમ્ન તન્ના, ત્રિભુવન વ્યાસ, નિલેશ રાણા, રમણભાઈ પટેલ, ભગવતીકુમાર શર્મા, હર્ષ બ્રહ્મભટ્ટ, યોગેશ જોશી ઉષા ઉપાધ્યાય, એષા દાદાવાળા ઈત્યાદિ કવિ – કવયિત્રીઓના વર્ષાગીતો પૂજા મહાકાળ, નિરંજના ગાંવિત, ઈશા માહલા, આરતી કટકીયા, પાયલ કળસરિયા, અનિતા પટેલ, મનીષા પટેલ, અમીષા માલે, પ્રિયા પટેલ, પનીતા રોહિત, બ્રિજલ પટેલ, લલિતા બોચલ, નિકિતા પટેલ, આરતી વરઠા તથા અંકિતા ધંધુકિયા દ્વારા રજૂ કરાયેલા આ ગીતોને વર્ષાઋતુમાં માણવાનો અદભૂત લ્હાવો મળ્યો હતો. ગુજરાતી વિભાગના ડૉ. જે.એમ.સોલંકી, પ્રા. એન.એન.પરમાર તથા ડૉ.આશાબેન ગોહિલની સક્રિય ભૂમિકાથી આ કાર્યક્રમ વરસાદી માહોલમાં વર્ષામય બની ગયો હતો.
