શંકાસ્પદ બોટ ઉપર ઓમાન લખેલું હતું : બોટમાંથી કોઈ વાંધાજનક ચીજવસ્તુ મળી આવી નથી
(વર્તમાન પ્રવાહ વાપી બ્યુરો)
વાપી, તા.11: વલસાડના કોસંબા ગામે મધ દરિયામાં શંકાસ્પદ બોટ મળી આવતા પોલીસ અને કોસ્ટગાર્ડએ દોડધામ કરી હતી. જો કે બોટમાંથી વાંધાજનક કોઈ ચીજવસ્તુ મળી નહી આવતા તંત્રએ રાહતનો શ્વાસ લીધો હતો.
કોસંબાનો નાવિક દરિયામાં હતો ત્યારે એક બીનવારસી બોટ તરતી તેને જણાઈ આવી હતી. તેથી નાવિકે તેની બોટ સાથે મળેલી બોટને ટોચન કરીને કિનારે લાવી લાંગરી હતી. નાવિકે ઘટનાની જાણ સિટી અને રૂરલ પોલીસને કરતા મોડી સાંજે પોલીસ કોસંબા દરિયા કાંઠે પહોંચી હતી. બીજી તરફ દમણ કોસ્ટગાર્ડને જાણ કરાતા કોસ્ટગાર્ડ ટીમ હેલિકોપ્ટર લઈને કોસંબા દરિયા કિનારે આવી પહોંચી હતી. બોટ ઉપર ઓમાન લખેલું હતું.બોટની અંદર તપાસ કરતા કોઈ વાંધાજનક ચીજવસ્તુ મળી આવી નહોતી તેથી પોલીસે રાહતનો શ્વાસ લીધો હતો. રાજ્ય કક્ષાના સ્વતંત્ર દિવસની ઉજવણી વલસાડમાં થવાની હોવાથી તંત્ર એલર્ટ છે.
