1 લાખથી ઓછી આવક ધરાવતા પરિવારો, એસ.સી., એસ.ટી. અને ઓ.બી.સી. પરિવારના સંતાનો દમણ અને દીવની ખાનગી શાળામાં મફત અભ્યાસ કરી શકે છે
(વર્તમાન પ્રવાહ ન્યુઝ નેટવર્ક)
દમણ, તા.09: કેન્દ્ર શાસિત પ્રદેશ દાદરા નગર હવેલી અને દમણ-દીવ શિક્ષણ નિયામકશ્રીની કચેરી દ્વારા બહાર પાડવામાં આવેલ અખબારી યાદી મુજબ ‘રાઈટ ઓફ ચિલ્ડ્રન ટુ ફ્રી એન્ડ કમ્પલસરી એજ્યુકેશન એક્ટ-2009ની કલમ12(1)ક હેઠળબિનઅનુદાનિત ખાનગી પ્રાથમિક શાળાઓમાં ધોરણ 1માં 25% જેટલા નબળા અને વંચિત જૂથના બાળકોને વિનામૂલ્યે પ્રવેશ આપવો ફરજીયાત છે. આથી આર્થિક રીતે નબળા વર્ગો કે જે કુટુંબોની વાર્ષિક આવક એક લાખ કે તેથી ઓછી હોય તેવા કુટુંબો, શારીરિક રીતે અક્ષમ બાળકો, 40% કરતા વધુ અક્ષમતાનું પ્રમાણપત્ર ધરાવતા બાળકો, અનુસૂચિત જનજાતિ(એસ.ટી.), અનુસુચિત જાતિ(એસ.સી.)વર્ગના અને ઓ.બી.સી. અને એચ.આઇ.વી.થી અસરગ્રસ્ત/એચઆઇવી અસરગ્રસ્ત સભ્ય સાથે રહે છે, જે દાદરા નગર હવેલી અને દમણ-દીવ પ્રશાસનના જાહેરનામામાં સૂચિત કરવામાં આવેલું છે એવા બાળકો પ્રવેશ માટે લાયક ગણવામાં આવશે.
અત્રે અખબારી યાદીમાં જણાવાયા પ્રમાણે ઉલ્લેખ કરેલ વર્ગના બાળકો કે જેઓએ છ વર્ષ પૂર્ણ કરેલ હોય, તેમની ઉંમર મર્યાદા માટે સંદર્ભ તારીખ 30મી સપ્ટેમ્બર 2024 રહેશે.
શાળાના નામની યાદી અને પ્રવેશની અનામત જગ્યા ધ્યાનમાં લઈ જરૂરી આધાર પુરાવાઓ સાથે પ્રવેશ અરજી જિલ્લા શિક્ષણ અધિકારીશ્રીની કચેરી, દાદરા નગર હવેલી, સેલવાસ અને સરકારી ઉચ્ચતર માધ્યમિક શાળા મરાઠી મીડીયમ, ખાનવેલ જીલ્લા શિક્ષણ અધિકારીની કચેરી, દમણ જિલ્લા શિક્ષણ અધિકારીશ્રીની કચેરી અને દીવ ખાતે 15મી માર્ચ 2023 સુધીમાં જાહેર રજા સિવાય ઓફિસ સમય દરમ્યાન જમા કરાવવાનીરહેશે. ખાનગી શાળામાં પ્રવેશ માટે અરજીપત્રકનો નિયત નમૂનો અને ખાનગી શાળાની યાદી અને અનામત જગ્યા દર્શાવતા પત્રકને અધિકૃત વેબસાઈટ http://dnh.gov.in, https://daman.nic.in, http://div.gov.in, https:ddd.gov.in પરથી ડાઉનલોડ કરી શકાશે.
અત્રે યાદ રહે કે, દાદરા નગર હવેલી અને દમણ-દીવમાં કાયમી રહેઠાણ અંગેનું પ્રમાણપત્ર ધરાવતા અરજદારોને પ્રથમ પસંદગી આપવામાં આવશે. આ યોજના અંતર્ગત દાનહની 25 ખાનગી શાળાઓમાં 572 બાળકોને પ્રવેશ આપવામા આવશે. જ્યારે દમણમાં 15 ખાનગી શાળાઓમાં 308 વિદ્યાર્થીઓ અને દીવમાં બે ખાનગી શાળામાં 13 વિદ્યાર્થીઓને પ્રવેશ અપાશે.
