વંકાલ ગામના જ વાસણીયા ફળિયામાં પણ દીપડો નજરે પડતાં આ વિસ્તારમાં પણ પાંજરું ગોઠવવામાં આવ્યું
(વર્તમાન પ્રવાહ ન્યુઝ નેટવર્ક)
ચીખલી (વંકાલ), તા.29: વંકાલ ગામના વજીફા ફળિયા વિસ્તારમાં એક સપ્તાહ પહેલા પૂર્વ સરપંચ દીપકભાઈના શેરડીના ખેતરમાં કામ કરી રહેલા શ્રમિકો સામે ધોળા દિવસે દીપડો ધસી આવ્યો હતો તેના બે દિવસમાં રાત્રી સમયે અંબા માતાના મંદિર પાસે રમણભાઈના કોઢારામાં વાછરડા પર હુમલો કર્યો હતો. જોકે સારવાર બાદ વાછરડાનું મોત નીપજ્યું હતું. ત્યારબાદ પણ વજીફા ફળિયામાં ખેતીવાડી વિસ્તારમાં દીપડો નજરે પડતાં વન વિભાગ દ્વારા રમણભાઈના ખેતર પાસે પાંજરું ગોઠવ્યું હતું. બાદમાં ગુરુવારના રોજ વન વિભાગ દ્વારા વજીફા ફળિયામાં ખેડૂત ભગુભાઈ અને રમણભાઈના ખેતરની હદમાં પાંજરાની આસપાસ ત્રણ જેટલા નાઈટ વિઝન કેમેરા ગોઠવવામાં આવ્યા છે દીપડાને પાંજરે પુરવા માટે કેમેરા દ્વારા દીપડાની ચહલ પર નજર રાખવામાં આવશે.
વજીફા ફળિયામાં દીપડાના આટા ફેરા વધી જતા સ્થાનિકોમાં ડરનો માહોલ છે તેવામાં કેમેરા ગોઠવવા સહિતની યુક્તિ દીપડાને પાંજરે પુરવામાં કેટલી સફળ રહેશે તેજોવું રહ્યું. થોડા મહિના પૂર્વે સાદકપોરમાં દીપડાના યુવતી પર હુમલાની ઘટના બાદ પાંચ પાંચ જેટલા પાંજરા અને કેમેરા ગોઠવાયા હતા. પરંતુ દીપડા કોઈ એક સ્થળે સ્થિર ન રહેતા હોય તેવામાં એક પણ દીપડો પાંજરે પુરાયો ન હતો.
