નાણામંત્રી કનુભાઈ દેસાઈની ધવલ પટેલએ વાપીમાં શુભેચ્છા મુલાકાત કરી
(વર્તમાન પ્રવાહ વાપી બ્યુરો)
વાપી, તા.14: બુધવારે મોડી રાતે વલસાડ-ડાંગ લોકસભાની બેઠક માટે ભાજપના ઉમેદવાર તરીકે ધવલ પટેલના નામની જાહેરાત થતા જ જિલ્લા ભાજપ પરિવારમાં ખુશીનો માહોલ છવાઈ ગયો હતો.
વલસાડ જિલ્લા ભાજપ મધ્યસ્થ ચૂંટણી કાર્યાલય અબ્રામામાં મોડી રાતે લોકસભા બેઠકના ઉમેદવાર ધવલ પટેલનો સ્વાગત-સત્કાર કાર્યક્રમ યોજાયો હતો. જિલ્લા ભાજપ પ્રમુખ હેમંત કંસારાની આગેવાનીમાં ધવલભાઈ પટેલનું સેંકડો કાર્યકરો દ્વારા ખુબ ઉત્સાહ અને ઉમંગ સાથે ફટાકડા ફોડી સ્વાગત કરવામાં આવ્યું હતું. આ પ્રસંગે ધવલ પટેલએ મોદીના નેતૃત્વમાં વલસાડની બેઠક 5 લાખ કરતા વધુ લીડથી જીતવાનો વિશ્વાસ વ્યક્ત કર્યો હતો. હેમંત કંસારાએ ધવલભાઈનું પુષ્પગુચ્છથી સ્વાગત કર્યું હતું. આ તબક્કે જિલ્લા મહામંત્રી કમલેશ પટેલ, શિલ્પેશ દેસાઈ, જિ.પં. પ્રમુખ મનહર પટેલ, ધારાસભ્ય ભરતભાઈ પટેલ સહિત સંગઠનના હોદ્દેદારો મોટી સંખ્યામાં ઉપસ્થિત રહ્યા હતા. વલસાડ ચૂંટણી મધ્યસ્થ કાર્યાલયની મુલાકાત બાદ વાપી ખાતે કેબિનેટ નાણામંત્રી કનુભાઈ દેસાઈની મુલાકાત લેવા પહોંચી ગયા હતા. વાપીમાં પણ ભાજપ કાર્યકરો સાથે ધવલભાઈને કનુભાઈ દેસાઈએ શુભેચ્છા પાઠવીહતી.
