કોંગ્રેસ મોવડી મંડળ સ્થાનિક કે પછી આયાતી ઉમેદવાર પર પસંદગીનો
કળશ ઢોળશે તેના પર તમામની નજર
(વર્તમાન પ્રવાહ ન્યુઝ નેટવર્ક)
ચીખલી(વંકાલ),તા.21: નવસારી લોકસભાની બેઠક ઉપર ભાજપમાં વર્તમાન સાંસદ અને ભાજપના પ્રદેશ અધ્યક્ષ સી.આર.પાટીલને રિપીટ કરવામાં આવ્યા છે. ગત ચૂંટણીમાં તેઓ રેકર્ડબ્રેક સરસાઈથી જીત્યા હતા અને હાલની ચૂંટણીમાં ગત ચૂંટણી કરતા પણ વધુ રેકર્ડબ્રેક સરસાઈથી જીતવાના દાવા કરાઈ રહ્યા છે. તેવામાં કોંગ્રેસમાં સી.આર.પાટીલ સામે મજબૂતાઈ થી લડી શકે તેવા મજબૂત ઉમેદવાર ઉતારવાના સ્થાને અસમંજસની સ્થિતિ જોવા મળી રહી છે.
કોંગ્રેસમાં છેલ્લા કેટલાક દિવસોથી આયાતી ઉમેદવાર ઉતારવાની પણ ચર્ચા ચાલી રહી છે. જેમાં નારાજગી સાથેવિરોધનો સૂર ઉભો થવા પામતા કાર્યકરો પણ મુંઝવણ ભરી સ્થિતિમાં મુકાયા હોવાનું જાણવા મળી રહ્યું છે. જોકે સ્થાનિક ઉમેદવારની જ માંગ પ્રબળ જોવા મળી રહી છે.
વધુમાં નવસારીની બેઠક ઉપર મૂળ ચીખલીના હાલે જિલ્લા કોંગ્રેસના પ્રમુખ શૈલેષભાઈ નગીનભાઈ પટેલ પણ મજબૂત દાવેદાર તરીકે ઉભરી રહ્યા છે. શૈલેષભાઇ કોળી સમાજમાં પણ સક્રિય હોવા સાથે યુવાન હોય અને બુલેટ ટ્રેન પ્રોજેકટમાં ખેડૂતોને અન્યાય થવાની વાત હોય કે સળગતા પ્રશ્નો તેઓ મજબૂતાઈ થી ઝંપલાવતા આવેલ છે અને સતત લોકોની પડખે રહેતા શૈલેષ પટેલ જે સમાજમાંથી આવે તે કોળી સમાજના 3.50 લાખ આસપાસના મતદારો છે. વધુમાં કોળી સમાજના મહત્તમ લોકો અત્યાર સુધી ભાજપને પડખે રહેતા આવ્યા છે. તેવામાં અઢી વર્ષની ટર્મ પૂર્ણ થતાં જિલ્લા પંચાયત અને ગણદેવી તાલુકા પંચાયતમાં પ્રમુખ પદે કોળીને સ્થાન આપવામાં આવ્યું ન હતું. તેવામાં કોંગ્રેસમાં કોળી અને સ્થાનિક ઉમેદવારનો લાભ પણ શૈલેષભાઈને મળી શકે અને તેમ થાય તો સી.આર.પાટીલની સરસાઈ પર પણ અસર થઈ શકે. જોકે રેકર્ડબ્રેક સરસાઈથી જીતવાની હોડમાં સામા પક્ષે નબળા અને આયાતી ઉમેદવાર આવે તેવો કારસો પણ રચવામાં આવી રહ્યો હોવાની ચર્ચા ચાલી રહી છે.
