(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.06: તાલુકા મથક ચીખલી પાસેથી પસાર થતી કાવેરી નદી ઉપરથી પસાર થતા ચીખલી-ખેરગામ-ધરમપુર રાજ્ય ધોરીમાર્ગ ઉપર હયાત બ્રિજની બાજુમાં 12.50 મીટર પહોળાઈના નવા બ્રિજ માટે રૂ.20.40 કરોડ અને ચીખલી-ઘેજ-અટગામ મુખ્ય જીલ્લા રોડ પર પણ હયાત બ્રિજની બાજુમાં 12.50 મીટર પહોળાઈના નવા બ્રિજ માટે રૂ.22.10 કરોડની માતબર ગ્રાન્ટ કેન્દ્રીય મંત્રી સી.આર.પાટીલ સહિતનાઓની સફળ રજૂઆતને સરકાર દ્વારા માતબર ગ્રાન્ટ મંજૂર કરવામાં આવતાં સ્થાનિકોમાં આનંદની લાગણી છવાઈ જવા પામી હતી.
કાવેરી નદી પર ઉપરોક્ત બને સ્થળે હયાત બ્રિજ પૂરતી પહોળાઈ ન હોવા સાથે ચીખલી-ખેરગામ રાજ્ય ધોરીમાર્ગ અને ચીખલી-અટગામ મુખ્ય જિલ્લા માર્ગ બે જિલ્લાને જોડતો હોયટ્રાફિકનું ભારણ વધુ હોય તેવામાં નવા બ્રિજ મંજૂર કરવામાં આવતાં આગામી દિવસોમાં સ્થાનિકોને મોટી રાહત થશે. જોકે ચીખલી-અટગામ મુખ્ય જિલ્લા માર્ગની પહોળાઈ વધારવાની પણ સ્થાનિકો દ્વારા લાંબા સમયથી રજૂઆત કરવામાં આવી રહી છે. ત્યારે નવા બ્રિજ બાદ પણ માર્ગનું વિસ્તૃતિકરણ પણ ઝડપથી થાય તે જરૂરી છે.
