ભંગારના ગોડાઉનોમાં અવારનવાર લાગતી આગો ખતરનાક સાબિત થઈ રહી છે
(વર્તમાન પ્રવાહ વાપી બ્યુરો)
વાપી, તા.15: વાપી ડુંગરી ફળીયા વિસ્તાર એટલે ભંગાર ગોડાઉનોનો જમેલો રહેણાંક વિસ્તારો વચ્ચે પણ ભંગારના ગોડાઉનો બિના રોકટોક ધમધમી રહ્યા છે. એવા ગોડાઉનોમાં અવારનવાર આગ લાગવાના બનાવો બનતા રહે છે. છીરી, રામનગર, ડુંગરી ફળીયા, બલીઠા, સલવાવ જેવા વિસ્તારોમાં અઢળક ભંગારના ગોડાઉનો ખતરો નોતરે એ રીતે કામગીરી કરી રહ્યા છે.
આજે ગુરૂવારે ડુંગરી ફળીયામાં આવેલ એક ભંગારના ગોડાઉનમાં બપોરના સુમારે અચાનક આગ ભભુકતા દોડધામ મચી જવા પામી હતી. આગને કારણે મોટા મોટા ધુમાડાના વાદળો છવાઈ જતા આજુબાજુના લોકોમાં ભયનો માહોલ છવાઈ ગયો હતો. ફાયર બ્રિગેડે ઘટના સ્થળે પહોંચી આગ બુઝાવી દીધી હતી. આગમાં અન્ય કોઈ જાનહાનીનો બનાવ બન્યો નથી. આગ લાગવાનું કારણ પણ અકબંધ રહ્યું છે.