ટેમ્પાએ અકસ્માતમાં બાઈક ચાલકને ટક્કર મારી દેતા ચાલક સારવાર હેઠળ
(વર્તમાન પ્રવાહ વાપી બ્યુરો)
વાપી, તા.13: વલસાડ ઔરંગા નદી બ્રિજ નજીક બિલાપોર તરફથી બેફામ આવી રહેલ પીકઅપ ટેમ્પા ચાલકે બેરીકેટ સાથે ધડાકાભેર ટેમ્પો ભટકાવ્યો હતો. અકસ્માતમાં એક બાઈકને પણ ટેમ્પો ભટકાતા બાઈક ચાલક ગંભીર રીતે ઘાયલ થયો હતો. બાઈક ચાલક યુવાનને સારવાર માટે કસ્તુરબા હોસ્પિટલમાં ખસેડાયો હતો.
વલસાડ ઔરંગા નદી બ્રિજ ઉપર બેરીકેટ લગાડવામાં આવ્યા છે. ગતરોજ લીલાપોર તરફથી બેફામ આવી રહેલ પીકઅપ ટેમ્પો નંબર જીજે 15 એસબી 0608 ના ચાલકે બેરીકેટ સાથેટેમ્પો ધડાકાભેર અથડાવ્યો હતો. અકસ્માતમાં ટેમ્પોની આગળ જઈ રહેલ બાઈક નં.જીજે 15 એએસ 1135 ના ચાલકને પણ ટેમ્પાએ અડફેટમાં લીધો હતો. અકસ્માતમાં બાઈક ચાલક યુવાન નીચે પટકાતા ગંભીર રીતે ઘાયલ થયો હતો. તાત્કાલિક લોકોએ નજીકની કસ્તુરબા હોસ્પિટલમાં ઘાયલ યુવાનને સારવાર માટે ખસેડયો હતો. ઘટનાની જાણ બાદ પોલીસ અને પી.ડબલ્યુ.ડી.ના અધિકારીઓ ઘટના સ્થળે પહોંચી ગયા હતા. અકસ્માતમાં ટેમ્પો આડો થઈ જતૌ મોટા વાહનનો વહેવાર અટકી ગયો હતો. પોલીસે ટેમ્પો ખસેડવાની તજવીજ હાથ ધરી કાયદેસરની કાર્યવાહી કરી હતી. ટેમ્પો બેફામ ગતિમાં હોવાથી અકસ્માત સર્જાયો હતો. મોટા વાહનોની અવર જવર થંભી જતા ટ્રાફિકની સમસ્યા પણ સર્જાઈ હતી.
